നിരവധി പേരാണ് തൃശ്ശൂര് കണ്ണിക്കര സ്വദേശി പ്രണവിന്റെ വിയോഗത്തില് വേദന പങ്കുവെച്ചുകൊണ്ട് എത്തുന്നത്. ഇപ്പോഴിതാ നടി സീമ ജി. നായര് പ്രണവിനെക്കുറിച്ച് പങ്കുവെച്ച വാക്കുകള് ശ്രദ്ധ നേടുകയാണ്.
പ്രണവിന് ആദരാഞ്ജലികള്. ഒരിക്കലെങ്കിലും ഈ പ്രിയപെട്ടവരെ കാണണമെന്ന് ആഗ്രഹിച്ചിരുന്നു. കഴിഞ്ഞ ദിവസം ഷഹാനയുടെ മുഖം നെഞ്ചില് ടാറ്റു ചെയ്ത വീഡിയോ കണ്ടപ്പോള് അടുത്ത് തന്നെ ഒന്ന് കാണണമെന്ന് ആഗ്രഹിച്ചു. പക്ഷെ ഇപ്പോള് കേട്ടത് വിശ്വസിക്കാന് പറ്റുന്നില്ല. രാവിലെ മുതലുള്ള ഓട്ടം കഴിഞ്ഞു വീട്ടില് എത്തിയപ്പോള് ന്യൂസില് കണ്ടത് ഇത്. ജീവിച്ചു കൊതി തീരാതെയാണല്ലോ മോനെ നിന്റെ മടക്കം. ആ കുട്ടി എങ്ങനെ ഇതിനെ അതിജീവിക്കും.
പ്രണവ് ഷഹാന എന്ന പേരിലാണ് ഇദ്ദേഹം സമൂഹമാധ്യമങ്ങളില് അറിയപ്പെട്ടിരുന്നത്. 2022 മാര്ച്ച് നാലിനാണ് പ്രണവ് തിരുവന്തപുരം സ്വദേശിയായ ഷഹാനയെ ജീവിത സഖിയാക്കുന്നത്. സമൂഹമാധ്യമത്തിലൂടെയുള്ള പരിചയം വിവാഹത്തിലെത്തുകയായിരുന്നു.
എട്ട് വര്ഷം മുന്പാണ് പ്രണവിന് അപകടം സംഭവിക്കുന്നത്. നിയന്ത്രണം വിട്ട് ബൈക്ക് ഒരു മതിലില് ഇടിച്ച് പരിക്കേല്ക്കുകയുമായിരുന്നു. നട്ടെല്ലിന് ഗുരുതരമായി പരിക്കേറ്റതിനെ തുടര്ന്നാണ് പ്രണവിന്റെ ശരീരം പൂര്ണമായും തളര്ന്നത്. മണപ്പറമ്പില് സുരേഷ് ബാബുവിന്റെയും സുനിതയുടെയും മകനാണ്.