ഇന്ത്യൻ ഗ്യാങ്ങ്സ്റ്റർ സിനിമകളിൽ ഏറ്റവും മികച്ച ചിത്രങ്ങളിലൊന്നാണ് അനുരാഗ് കശ്യപ് സംവിധാനം ചെയ്ത ‘ഗ്യാങ്ങ്സ് ഓഫ് വസേപുർ പാർട്ട് 1&2’. ധൻബാദിലെ ഗ്യാങ്ങ്സ്റ്റർ സംഘങ്ങളുടെ കഥ പറഞ്ഞ ചിത്രം പ്രേക്ഷക- നിരൂപക പ്രശംസകൾ ഒരുപോലെ ഏറ്റുവാങ്ങി.
മനോജ് ബാജ്പേയി, നവാസുദ്ദീൻ സിദ്ദിഖി, പങ്കജ് ത്രിപാഠി, റിച്ച ചദ്ദ, ഹുമ ഖുറേഷി തുടങ്ങീ വമ്പൻ താരനിരയാണ് ചിത്രത്തിൽ അണിനിരന്നിരുന്നത്. 2012-ൽ പുറത്തിറങ്ങിയ ചിത്രത്തിന്റെ റിയലിസ്റ്റിക് മേക്കിംഗ് കൊണ്ട് ഇന്നും നിരവധി പ്രശംസകളാണ് ചിത്രത്തിന് കിട്ടികൊണ്ടിരിക്കുന്നത്.
ഇപ്പോഴിതാ ചിത്രത്തെ കുറിച്ച് സംസാരിക്കുകയാണ് പങ്കജ് ത്രിപാഠി. സുൽത്താൻ ഖുറേഷി എന്ന ഗ്യാങ്ങ്സ്റ്റർ നേതാവായാണ് പങ്കജ് ചിത്രത്തിൽ വേഷമിട്ടത്. ചിത്രം കണ്ട് യഥാർത്ഥ ഗുണ്ടാ നേതാക്കൾ തന്നെ കാണാൻ വന്നുവെന്നാണ് പങ്കജ് ത്രിപാഠി പറയുന്നത്.
“പറയുന്നത് ചെയ്യുന്നയാളാണ് സിനിമയിലെ സുൽത്താൻ ഖുറേഷിയെന്നാണ് അവർ വിചാരിച്ചിരുന്നത്. അതേസമയം വളരെ നല്ല സ്വഭാവമുള്ള കഥാപാത്രമായിരുന്നു അത്. അതുകൊണ്ടാണ് സുൽത്താനെ അവർ കൂടുതൽ ഇഷ്ടപ്പെടാൻ കാരണം. ഈ സിനിമ ഇറങ്ങിയശേഷം തിരക്കഥ ചർച്ച ചെയ്യാൻ വരുന്ന രചയിതാക്കൾ അല്പം ഭയത്തോടെയാണ് എന്നെ സമീപിച്ചിരുന്നത്. ചർച്ചയ്ക്കിടെ ഞാൻ പോക്കറ്റിൽനിന്ന് കത്തിയെടുത്ത് വീശുമോ എന്നായിരുന്നു അവർ പേടിച്ചിരുന്നത്.
ഗ്യാങ്സ് ഓഫ് വസേപുറിൽ അവസരം ലഭിക്കുന്നതിനുമുമ്പ് രാംഗോപാൽ വർമയെ കാണാൻ പോയി. നാലുപേർക്കിരിക്കാവുന്ന ബെഞ്ചിലാണ് ഇരിക്കാൻ പറഞ്ഞത്. ബെഞ്ചിന്റെ ഒരരികിൽ ഇരുന്നപ്പോൾ രാംഗോപാൽ വർമ അതേ ബെഞ്ചിന്റെ മറ്റേയറ്റത്ത് ഇരിപ്പുറപ്പിച്ചു. അതോടെ ആ ബെഞ്ചിലിരിക്കാൻ ഇനിയും ആളുകൾ വരുമല്ലോ എന്നുള്ള ആലോചനയായി. ആരെങ്കിലും നിങ്ങളെ പതിനഞ്ച് മിനിറ്റ് തുടർച്ചയായി നോക്കിക്കൊണ്ടിരുന്നാൽ മറ്റെവിടെ നോക്കുമെന്ന് നിങ്ങൾ ആലോചിക്കും. അന്നവിടെ നിന്ന് പറഞ്ഞുവിട്ട എന്നെ ആർജിവി പിന്നീട് വിളിച്ചിട്ടേയില്ല.” ആപ് കി അദാലത്ത് എന്ന പരിപാടിയിലാണ് പങ്കജ് ത്രിപാഠി അനുഭവം പങ്കുവെച്ചത്.