മകളുടെ വിവാഹം നടക്കുന്ന ജനുവരിയിലാണ് തങ്ങളുടെ യഥാര്‍ഥ ഓണമെന്ന് നടന്‍ സുരേഷ് ഗോപി. തിരുവോണ ദിനത്തില്‍ മാധ്യമങ്ങളോട് സംസാരിക്കുകയായിരുന്നു സുരേഷ് ഗോപി. മകളുടെ വിവാഹവുമായി ബന്ധപ്പെട്ട തിരിക്കിലാണ് ഇപ്പോഴുള്ളതെന്നും വീടിന്റെ ചില പണികള്‍ പൂര്‍ത്തിയാക്കാനുണ്ടെന്നും സുരേഷ് ഗോപി പറഞ്ഞു.
‘ഞങ്ങള്‍ക്ക് അങ്ങനെ പ്രത്യേകതയില്ലാത്ത ഓണമാണ് ഇത്തവണ. ഞങ്ങളുടെ ഓണം ജനുവരിയിലാണെന്നാണ് നിശ്ചയിച്ചിരിക്കുന്നത്. അതിന്റെ ഒരു തിരക്കിലും ഓട്ടത്തിലുമാണ്. വീട് തന്നെയൊന്ന് പെയ്ന്റ് ചെയ്യണം. കല്യാണത്തിന് മുന്‍പുള്ള ഒരുക്കത്തിന്റെ ഭാഗമായി സാധനങ്ങളെല്ലാം പൊടി കയറാത്ത തരത്തില്‍ സീല്‍ ചെയ്ത് എല്ലാ മുറികളിലും ഹാളിലും വെച്ചിരിക്കുകയാണ്. ഈ വീട് നിര്‍മിച്ചിട്ട് 26 വര്‍ഷമായി.
അതുകൊണ്ട് ഒരു മേജര്‍ റീഹാളിംഗ് നടക്കുന്ന സമയമാണ്. അതുകൊണ്ട് ഓണം എന്ന് പറയുന്നത് ഞെരുക്കത്തിലായി പോയി. ഞാനും വൈഫും കല്യാണപ്പെണ്ണും ദിക്കുകള്‍ ചുറ്റി അവള്‍ക്ക് വേണ്ടുന്ന ഒരുക്കങ്ങളുടെ തയ്യാറെടുപ്പിന് വേണ്ടി നടക്കുകയാണ്.
ഇന്നലെയാണ് ഞങ്ങള്‍ ബോംബെയില്‍ നിന്ന് വന്നത്. ബാക്കി ആണ്‍പിള്ളേരും അമ്മായിയും അവരുടെ കസിന്‍സും ഒക്കെ ഇവിടെ തന്നെയുണ്ട്. എല്ലാം കൂടി ബഹളത്തിലായി പോയി. ഓണവും ആ ബഹളത്തില്‍ മുങ്ങിയിരിക്കുകയാണ്’ സുരേഷ് ഗോപി പറഞ്ഞു.
