ഇന്ത്യയുടെ പേര് മാറ്റി ഭാരതം എന്നാക്കാനുള്ള കേന്ദ്ര സർക്കാരിന്റെ നീക്കം സമീപകാല ഇന്ത്യൻ രാഷ്ട്രീയത്തിൽ വലിയ വാർത്തകൾക്കും വിവാദങ്ങൾക്കും വഴിതെളിച്ചിരുന്നു. പേര് മാറ്റുന്നതിനെ അനുകൂലിച്ചും പ്രതികൂലിച്ചും നിരവധി ആളുകൾ രംഗത്തുവന്നിരുന്നു. പേര് മാറ്റത്തെ അനുകൂലിച്ച് ചില സിനിമകളുടെ പേരുകൾ വരെ മാറ്റിയിരുന്നു.
ടിനു സുരേഷ് സംവിധാനം ചെയ്ത അക്ഷയ് കുമാറിന്റെ ഏറ്റവും പുതിയ ചിത്രമായ ‘മിഷൻ റാണിഗഞ്ച്: ദി ഗ്രേറ്റ് ഇന്ത്യൻ റെസ്ക്യു’ എന്ന ചിത്രത്തിന്റെ പേര് കഴിഞ്ഞ ദിവസം മാറ്റിയിരുന്നു. മിഷൻ റാണിഗഞ്ച്: ദി ഗ്രേറ്റ് ഭാരത് റെസ്ക്യു എന്നാണ് ചിത്രത്തിന്റെ ഏറ്റവും പുതിയ പേര്.
ഇപ്പോഴിതാ പേര് മാറ്റത്തെ അനുകൂലിച്ച് സിനിമയിലെ നായകനായ അക്ഷയ് കുമാർ രംഗത്തുവന്നിരിക്കുകയാണ്. “ഭാരത് ഒരു തെറ്റായ പേരാണോ? ഇന്ത്യ എന്ന പേരും തെറ്റല്ല. തികച്ചും ശരിയാണ്. ഭാരതം ഒരു മഹത്തായ പേരായതിനാൽ ഞങ്ങൾ സിനിമയുടെ ടാഗ് ലൈൻ മാറ്റി. നമ്മുടെ ഭരണഘടനയിലും ഈ പേരുണ്ട്. അതിനാലാണ് ഞങ്ങൾ ഈ തീരുമാനത്തിൽ എത്തിയത്” എന്നാണ് അക്ഷയ് കുമാർ പറഞ്ഞത്.
കൽക്കരി ഖനിയിൽ കുടുങ്ങിയ 65 തൊഴിലാളികളെ രക്ഷിക്കാനുള്ള ദൗത്യത്തിന് നേതൃത്വം നൽകിയ എഞ്ചിനീയർ ജസ്വന്ത് സിംഗ് ഗില്ലിന്റെ ജീവിതത്തെ ആസ്പദമാക്കി ആണ് ചിത്രം നിർമ്മിച്ചിരിക്കുന്നത്. 55 കോടി രൂപയാണ് ചിത്രത്തിന്റെ ബഡ്ജറ്റ്