ആളുകള്‍ക്ക് ഒരു പ്രശ്നം വന്നാല്‍ വന്ന് സംസാരിക്കാന്‍ തോന്നുന്ന ഒരാളായിട്ട് തന്നെ കാണാറുണ്ടെന്ന് നടി മഞ്ജു വാര്യര്‍. മലയാളി പ്രേക്ഷകര്‍ക്ക് അവരുടെ വേദനകള്‍ പങ്കുവയ്ക്കാന്‍ തോന്നുന്ന ആളായിട്ട് തന്നെ കാണാറുണ്ട് എന്നാണ് മഞ്ജു വാര്യര്‍ പറയുന്നത്.
ആളുകള്‍ക്ക് ഒരു പ്രശ്നം വന്ന് പറയാന്‍ തോന്നുന്ന ഒരാളായിട്ട് തന്നെ കാണാറുണ്ടെന്ന് തോന്നിയിട്ടുണ്ട്. ജനപ്രതിനിധികളും താനും ഇരിക്കുന്ന പല ചടങ്ങുകളിലും അത്തരം അനുഭവങ്ങള്‍ ഉണ്ടായിട്ടുണ്ട്. നിവേദനങ്ങള്‍ കൊണ്ട് പലരും തന്റെ അടുത്താണ് വരുക. തനിക്ക് അല്ല തരേണ്ടത്, ഇവിടേക്ക് കൊടുക്കണമെന്ന് പറയേണ്ടി വന്നിട്ടുണ്ട്.
അങ്ങനെയല്ല, മോള്‍ ഇത് വായിക്കണമെന്ന് പറഞ്ഞിട്ട് തന്റെ കയ്യിലേക്ക് കൊണ്ടു തരാറുണ്ട്. അവരുടെ വേദനകള്‍ മനസിലാക്കാന്‍ പറ്റുന്ന ആളായിട്ടോ ആ ഒരു സ്വാതന്ത്ര്യം തോന്നുന്ന വ്യക്തിയായിട്ടോ ആണ് മലയാളി പ്രേക്ഷകര്‍ തന്നെ കണ്ടിട്ടുള്ളതെന്ന് തോന്നിയിട്ടുണ്ട് എന്നാണ് മഞ്ജു ഫ്‌ളവേഴ്‌സ് ചാനലിലെ ഷോയില്‍ പറയുന്നത്.
തിരഞ്ഞെടുപ്പില്‍ മത്സരിക്കുന്നു എന്ന വാര്‍ത്ത പ്രചരിച്ചതിനെ കുറിച്ചും മഞ്ജു സംസാരിച്ചു. തിരഞ്ഞെടുപ്പില്‍ മത്സരിക്കുമോ എന്ന് ചോദിച്ച് കൊണ്ട് നേതാക്കള്‍ സമീപിച്ചിട്ടുണ്ട്. ഏതൊക്കെ മണ്ഡലത്തിന്റെ പേര് പറഞ്ഞു. എന്നാല്‍ തനിക്ക് അതിനുള്ള കഴിവും താല്‍പര്യവുമില്ല.
രാഷ്ട്രീയത്തിലൂടെ അല്ലാതെ ജനങ്ങളെ സേവിക്കാനുള്ള കഴിവേ തനിക്കുള്ളൂ. അധികം രാഷ്ട്രീയം ഫോളോ ചെയ്യാറുമില്ല. അടിസ്ഥാനപരമായ കാര്യങ്ങളൊക്കെ നോക്കാറുണ്ട്. ഒരുവിധം നേതാക്കളെയൊക്കെ കണ്ടാല്‍ അറിയാം എന്നാണ് താരം പറഞ്ഞത്.