മകള് മാതംഗിയുടെ ഏഴാം ജന്മദിനത്തില് ഹൃദ്യമായ കുറിപ്പ് പങ്കുവച്ച് നടി ലക്ഷ്മി പ്രിയ. കുഞ്ഞ് ജനിച്ചോ എന്ന് ചോദിക്കുന്നവരോട് നിറഞ്ഞൊഴുകുന്ന കണ്ണുകള് ആയിരുന്നു തന്റെ മറുപടി. കാരണം കുഞ്ഞ് ജനിച്ചോ ഇല്ലയോ എന്ന് അറിയില്ലായിരുന്നു. മൂന്ന് ദിവസത്തിന് ശേഷമാണ് കുഞ്ഞിന് കണ്ടത് എന്നാണ് ഫെയ്സ്ബുക്കില് പങ്കുവച്ച കുറിപ്പില് ലക്ഷ്മി പ്രിയ പറയുന്നത്.
ലക്ഷ്മി പ്രിയയുടെ കുറിപ്പ്:
അമ്മയുടെ ജീവിതത്തിലെ ഏറ്റവും മനോഹരമായ അധ്യായത്തിന് ഇന്ന് ഏഴാം പിറന്നാള്. ജന്മ ജന്മാന്തര ആനന്ദത്തിന്റെ ഏഴു വര്ഷങ്ങള്….. 3 ദിവസങ്ങള്ക്ക് ശേഷം വീല് ചെയറില് ഇരുന്ന് നിന്നെ കാണാന് NICU വിലേക്ക് അമ്മ വരുമ്പോ ലക്ഷ്മിക്ക് കുഞ്ഞ് ജനിച്ചോ എന്ന് ചോദിക്കുന്നവരോട് ജനിച്ചു എന്ന് പറയണോ ഇല്ല എന്ന് പറയണോ എന്ന് എനിക്കറിയില്ലായിരുന്നു.
നിറഞ്ഞൊഴുകുന്ന കണ്ണുകള് ആയിരുന്നു മറുപടി. ഒരുപാട് ട്യൂബുകള്ക്കും വയറുകള്ക്കും നടുവില് എന്റെ പിഞ്ചോമനയെ കണ്ട നിമിഷം വാവിട്ട് ഞാന് കരഞ്ഞുപോയി. കണ്പീലികള് പോലുമില്ലാതെ അമ്മയുടെ കൈപ്പത്തി വലുപ്പത്തില് ഒരു പൂമ്പാറ്റ. ആ പൂമ്പാറ്റയ്ക്ക് അച്ഛയും അമ്മയും പ്രാര്ത്ഥനയോടെ ഉറങ്ങാതെ കാവലിരുന്നു…. നിന്റെ ഓരോ പ്രവര്ത്തികളും എനിക്ക് അതിശയമാണ്, അവിശ്വസനീയമാണ്..
ഗര്ഭത്തിന്റെ ഇരുപത്തി ഏഴാം ആഴ്ച ജനിച്ച തങ്കം നീ എനിക്ക് ഒരത്ഭുതമാണ്. ഒരു കിലോയില് നിന്നും രണ്ടിലേക്കെത്തുന്നത് നോക്കിയിരുന്ന പൊന്നുമകള് ഇന്ന് അമ്മയുടെ ഏറ്റവുമടുത്ത കൂട്ടുകാരിയാണ്. അമ്മയും മകളുമായി എത്ര എത്ര സ്വകാര്യങ്ങള്. എത്ര എത്ര സുന്ദര നിമിഷങ്ങള്.. വളരണം വലുതാകണം, ഹൃദയ ശുദ്ധിയോടെ, ഈശ്വര ഭക്തിയോടെ, അളവറ്റ കാരുണ്യത്തോടെ എന്റെ മാതംഗിയെ, മാതുക്കുട്ടിയെ, മാത്തച്ഛനെ ഞങ്ങള്ക്ക് നല്കിയ മൂകാംബിക ദേവിയ്ക്കും ഗുരുവായൂര് കണ്ണനും നന്ദി പറയുന്നു.