മൂന്ന് വര്‍ഷത്തെ ഇടവേളയ്ക്ക് വിരാമമിട്ട് ഷാജി എന്‍ കരുണ്‍ സംവിധാനം ചെയ്ത ഓള് തിയേറ്ററുകളിലെത്താനുള്ള തയ്യാറെടുപ്പുകളിലാണ്. ചലച്ചിത്രമേളയില്‍ പ്രേക്ഷകരുടെ അനുമോദനങ്ങളേറ്റു വാങ്ങിയ ചിത്രത്തില്‍ നായികയായെത്തുന്നത് നടി എസ്തര്‍ അനിലാണ്.
പ്രായപൂര്‍ത്തി എത്തുംമുമ്പ് കൂട്ട ബലാത്സംഗത്തിന് ഇരയാകുന്ന പെണ്‍കുട്ടിയുടെ ജീവിതവും അവളുടെ പ്രണയവും ഇതിവൃത്തമാകുന്ന ചിത്രത്തില്‍ മായ എന്ന കഥാപാത്രമായാണ് എസ്തര്‍ എത്തുന്നത്. മായയെ കുറിച്ച് നടിയുടെ വാക്കുകള്‍ ഇങ്ങനെ
“വളരെ ശക്തമായ കഥാപാത്രമാണിത്. മറ്റുള്ള താരങ്ങളുമായി കോമ്പിനേഷന്‍ സീനുകള്‍ ഒന്നുമില്ലെങ്കിലും ഒരുപാട് ഇമോഷന്‍സ് അവതരിപ്പിക്കേണ്ടി വന്നു. തുടക്കത്തില്‍ അതൊരു വെല്ലുവിളിയായി തോന്നിയെങ്കിലും പിന്നീട് പതുക്കെ ശരിയായി. മായ എന്നാണ് കഥാപാത്രത്തിന്റെ പേര്. കുടുതല്‍ വിശേഷങ്ങള്‍ സിനിമ കാണുമ്പോള്‍ പ്രേക്ഷകര്‍ക്ക് മനസ്സിലാകും.”
കടലും കായലും കഥാപാത്രങ്ങളാകുന്ന ചിത്രത്തില്‍ ഷെയ്ന്‍ നിഗം, എസ്തര്‍ അനില്‍ എന്നിവരാണ് പ്രധാന കഥാപാത്രങ്ങളാകുന്നത്. കാദംബരി ശിവായ, കനി സുകൃതി, കാഞ്ചന, പി ശ്രീകുമാര്‍, എസ് ഗോപാലകൃഷ്ണന്‍ എന്നിവരാണ് മറ്റുതാരങ്ങള്‍.
കാസര്‍ഗോഡ് ജില്ലയിലെ അഴിത്തല അഴിമുഖം, മുണ്ടേമാട്, കന്നുവീട് കടപ്പുറം, ഇടയിലക്കാട്, മാടക്കാല്‍ എന്നിവിടങ്ങളിലായിരുന്നു ചിത്രീകരണം. എ.വി അനൂപ് ആണ് നിര്‍മ്മാണം. കഴിഞ്ഞ വര്‍ഷത്തെ ഗോവന്‍ അന്താരാഷ്ട്ര മേളയിലെ ഇന്ത്യന്‍ പനോരമയുടെ ഉദ്ഘാടന ചിത്രമായിരുന്നു “ഓള്”.