ദുല്ഖറിന്റെ മലയാള അരങ്ങേറ്റ ചിത്രമായിരുന്നു സെക്കന്ഡ് ഷോ. ഇപ്പോഴിതാ ശ്രീനാഥ് രാജേന്ദ്രന് സംവിധാനം ചെയ്ത ചിത്രത്തിന്റെ ഷൂട്ടിംഗ് സമയത്തുണ്ടായ ഒരു അനുഭവം പങ്കുവെച്ചിരിക്കുകയാണ് നടന്. ഒരു സീന് ശ്രീനാഥ് മനഃപൂര്വം തന്നെ കൊണ്ട് വീണ്ടും വീണ്ടും ചെയ്യിച്ചതിനെ കുറിച്ചാണ് ദുല്ഖര് പറയുന്നത്.
‘ കോഴിക്കോട് ഭാഗത്താണ് ഷൂട്ട്. ഒരു ചായക്കടയിലോ മറ്റോ ഇരുന്നുള്ള സീന്. ഭയങ്കര ക്രൗഡുണ്ട്. ഞാന് ആരാണെന്നൊന്നും അവര്ക്ക് അറിയില്ല. പക്ഷേ ഒരു സിനിമാ ഷൂട്ടിംഗ് നടക്കുന്നതു കൊണ്ടാവാം ആളുകള് കൂടിയിട്ടുണ്ട്. ഒരു ചെറിയ ടൗണ് ആണ്. ഷൂട്ട് തുടങ്ങിയതോടെ വെറുതെ ആളുകള് നമ്മളെ കളിയാക്കാനും വഴക്കു പറയാനുമൊക്കെ തുടങ്ങി. ഇന്നയാളുടെ മോനാണ്, നിന്നെക്കൊണ്ടൊന്നും പറ്റില്ലെടാ എന്നൊക്കെ പറഞ്ഞ് ചുമ്മാ വഴക്കു പറയുകയാണ്
ശ്രീനാഥ് ഒരു 40 ടേക്ക് ആവുന്നതു വരെ കട്ട് പറയുന്നില്ല. വണ്സ് മോര് എന്ന് പറഞ്ഞു കൊണ്ടിരിക്കുകയാണ്. എനിക്ക് ആണെങ്കില് ഒന്നും മനസിലാകുന്നില്ല. ഞാന് വിയര്ത്ത് കുളിച്ച്, ഇത് എന്നെ കൊണ്ട് പറ്റാത്ത പണിയായിരിക്കുമെന്നും ഞാന് അത്രയും മോശം ആക്ടറായിരിക്കും എന്നൊക്കെ ഉറപ്പിച്ച് തകര്ന്ന് ഇരിക്കുകയാണ്. എന്തായിരുന്നു ലാസ്റ്റ് ടേക്കിലെ പ്രശ്നമെന്ന് ഒടുവില് ഞാന് ശ്രീനാഥിനോട് ചോദിച്ചു. ഏയ് അതൊന്നും ഇല്ല, നിന്റെ ഈ പേടി മാറട്ടെ എന്ന് കരുതി ചെയ്തതാണെന്ന് പറഞ്ഞു.
കുറുപ്പിന്റെ സെറ്റില് വെച്ച് അങ്ങനെ എന്തെങ്കിലും ചെയ്യിച്ചോ എന്ന ചോദ്യത്തിന് ഇല്ലെന്നായിരുന്നു ദുല്ഖറിന്റെ മറുപടി.