സിനിമാ പ്രേമികള്‍ തന്നെ ജൂണിയര്‍ ഇന്നസെന്റ് എന്ന് വിളിക്കുന്നുണ്ടെങ്കില്‍ അത് തന്റെ പരാജയമാണെന്ന് നടന്‍ അജു വര്‍ഗീസ്. തന്റെ കരിയറിന്റെ തുടക്കത്തില്‍ ഇന്നസെന്റിന്റെ അഭിനയത്തിന്റെ ഇന്‍ഫ്‌ളുവന്‍സ് തനിക്കുണ്ടായിരുന്നു. പക്ഷെ, ഒരിക്കല്‍ പോലും അദ്ദേഹത്തെ കോപ്പി പേസ്റ്റ് ചെയ്യാന്‍ താന്‍ ശ്രമിച്ചിട്ടില്ല. അങ്ങനെ ആളുകള്‍ക്ക് തോന്നിയാല്‍ അത് അഭിനേതാവ് എന്ന നിലയിലുള്ള തന്റെ പരാജയമാണെന്നും അജു വര്‍ഗീസ് പറഞ്ഞു.
ധ്യാന്‍ ശ്രീനിവാസന്റെ ആദ്യ സംവിധാന സംരംഭം ലവ് ആക്ഷന്‍ ഡ്രാമയിലായിരിക്കും 2018ല്‍ തന്റെ പൂര്‍ണമായ ശ്രദ്ധയെന്നും ധ്യാന്‍ സംവിധായകനായി അരങ്ങേറുന്നതിനൊപ്പം താന്‍ നിര്‍മ്മാതാവായി അരങ്ങേറ്റം നടത്തുന്ന ചിത്രമാണതെന്നും അജു പറഞ്ഞു.
ഗൂഢാലോചനയുടെ പരാജയം ഭയപ്പെടുത്തുന്നുണ്ടോ എന്ന് ചോദിച്ചപ്പോള്‍ അത്തരം ഭയമില്ലായെന്നുള്ള പ്രതികരണമാണ് അജു നടത്തിയത്. ലവ് ആക്ഷന്‍ ഡ്രാമയുടെ തിരക്കഥ ശക്തമാണ് എന്ന് തോന്നിയതിനാലാണല്ലോ നയന്‍താരയും നിവിന്‍പോളിയും ഈ ചിത്രത്തില്‍ അഭിനയിക്കാന്‍ തയാറായതെന്നും അജു വര്‍ഗീസ് ചോദിച്ചു.
തോമസ് കെ. സെബാസ്റ്റിയന്‍ സംവിധാനം ചെയ്ത ഗൂഢാലോചനയുടെ തിരക്കഥ തയാറാക്കിയത് ധ്യാന്‍ ശ്രീനിവാസനായിരുന്നു.
ഈ വര്‍ഷം 19 സിനിമകളിലാണ് അജു വര്‍ഗീസ് അഭിനയിച്ചത്. “ഒരു വര്‍ഷം ഇത്രയധികം സിനിമ ചെയ്യാന്‍ സാധിച്ചു എന്നതില്‍ മഹത്തരമായി ഒന്നുമില്ല. സിനിമകള്‍ ചെയ്തതില്‍ സന്തോഷം. ഒരുപാട് ആളുകളെ പരിചയപ്പെടാനും പുതിയ അനുഭവങ്ങള്‍ നേടാനും സാധിച്ചു” – അജു പറഞ്ഞു.
കൊച്ചി ടൈംസ്