കബളിപ്പിച്ച് അശ്ലീല സിനിമയില് അഭിനയിപ്പിച്ചു എന്ന വാദവുമായി യുവാക്കളും യുവതികളും രംഗത്ത് വന്ന സാഹചര്യത്തില് വര്ഷങ്ങള്ക്ക് മുമ്പേ താന് ചെയ്ത സിനമയെ കുറിച്ച് പറഞ്ഞ് സംവിധായകനും സെലിബ്രിറ്റി ഫോട്ടോഗ്രാഫറുമായ അനീഷ് ഉപാസന. 2012ല് പുറത്തിറങ്ങിയ ‘മാറ്റിനി’ എന്ന ചിത്രം സംസാരിച്ചതും ഇതേ വിഷയമായിരുന്നു.
തന്റെ സിനിമ കാലങ്ങള്ക്ക് ശേഷം ഒരു യഥാര്ത്ഥ സംഭവവുമായി ബന്ധപ്പെട്ട് വീണ്ടും ചര്ച്ചയാകുമ്പോള് സംവിധായകനെന്ന നിലയില് സന്തോഷമാണല്ലോ തോന്നേണ്ടത്. എന്നാല് തന്നെ സംബന്ധിച്ചു വലിയ നിരാശയാണുള്ളത്. ഇപ്പോഴും ഇത്തരം ചതികള് സംഭവിച്ചു കൊണ്ടേയിരിക്കുന്നുവെന്നത് ഗൗരവതരമാണ് എന്നാണ് അനീഷ് പറയുന്നത്.
മാറ്റിനി ഒരു മുന്നറിയിപ്പ് എന്ന നിലയില് കൂടിയാണ് ചെയ്തത്. നൂലിഴ വ്യത്യാസത്തില് ഇത്തരം ചതികളില് നിന്നു രക്ഷപ്പെട്ട പലരും ആ സിനിമ കണ്ട ശേഷം തന്നെ വിളിച്ച് സംസാരിച്ചിരുന്നു. ഓഡിഷന് കഴിഞ്ഞ്, സംഗതി ഇതാണെന്നു മനസിലായപ്പോള് ഇറങ്ങി ഓടിയവരും അക്കൂട്ടത്തിലുണ്ട്.
സോഷ്യല് മീഡിയ ഇത്രയും സജീവമായ, എന്തിനെക്കുറിച്ചും കൃത്യമായ വിവരങ്ങള് ലഭിക്കുന്ന ഇക്കാലത്തും ആളുകള് ഇത്തരം ചതികളില് ചെന്നു ചാടുന്നതാണു വലിയ സങ്കടം. പണ്ടാണെങ്കില് സിനിമയെ കുറിച്ചറിയാന് ഇത്രയും മാര്ഗങ്ങളില്ല. ഇപ്പോഴാണെങ്കില് അങ്ങനെയല്ലല്ലോ. എല്ലാക്കാലത്തും എല്ലാത്തരം ആളുകളുമുണ്ടാകും.
അതില് ശരിയായ ആളുകളെയും മോശം ആളുകളെയും തിരിച്ചറിയുക എന്നതാണല്ലോ പ്രധാനം എന്നാണ് അനീഷ് പറയുന്നത്. അതേസമയം, തന്റെ നാട്ടില് ഇങ്ങനെ ചതിക്കപ്പെട്ട ഒരു ചെറുപ്പക്കാരന്റെ ജീവിതം തന്നെയാണ് താന് സിനിമയാക്കിയത് എന്നും അനീഷ് വ്യക്തമാക്കി.