തെന്നിന്ത്യൻ സിനിമാ ലോകത്ത് ഏറെ ചർച്ചയായ സംഭവമായിരുന്നു നടി സമാന്തയും നാഗചൈതന്യയും തമ്മിലുള്ള വിവാഹ മോചനം. ഇരുവരും തമ്മിൽ വേർപിരിഞ്ഞ് ഒരു വർഷം തികയുമ്പോഴും വിവാഹ മോചനത്തെക്കുറിച്ച് നാഗാർജുനയും ഭാര്യ അമലയും ഇതുവരെ പ്രതികരിച്ചിട്ടില്ല. ഇപ്പോഴിതാ അമലയുടെ പഴയയൊരു അഭിമുഖത്തിലെ കുറച്ച് ഭാഗങ്ങളാണ് വീണ്ടും ശ്രദ്ധ നേടുന്നത്.
മരുമകൾ സമാന്ത നിങ്ങൾക്ക് ഭക്ഷണം പാകം ചെയ്തു തരാറുണ്ടോ എന്നായിരുന്നു അഭിമുഖത്തിനിടെ അവതാരകൻ അമലയോട് ചോദിച്ചത്. അവൾ എന്തിനാണ് തനിക്ക് ഭക്ഷണമുണ്ടാക്കിത്തരുന്നത് എന്നാണ് അമല മറുപടി നൽകിയത്. ഞങ്ങൾക്ക് വീട്ടിൽ മികച്ച പാചകക്കാർ ഉണ്ട്.
ഈ പാചകക്കാർ ഉള്ളപ്പോൾ എന്തിനാണ് കുക്ക് ചെയ്യുന്നതെന്ന് താൻ സമാന്തയോട് ചോദിക്കാറുണ്ടെന്നും അവർ പറഞ്ഞു. തന്റെ ഭർത്താവ് നാഗാർജുന പാചകം ചെയ്യാൻ ഇഷ്ടപ്പെടുന്ന ആളാണ്. പാചകം ചെയ്യുന്നത് സമ്മർദം കുറയ്ക്കുമെന്നാണ് അദ്ദേഹം പറയുന്നത്. അദ്ദേഹം പാകം ചെയ്യാൻ വരുമ്പോൾ എല്ലാ ചേരുവകളും താൻ ഒരുക്കി വെക്കും. അദ്ദേഹം വന്ന് പാചകം ചെയ്യാറുണ്ടെന്നും അമല അന്ന് പറഞ്ഞു.
അമലയും സമാന്തയും തമ്മിൽ വിവാഹ ശേഷം നല്ല സൗഹൃദത്തിലുമായിരുന്നു. നാഗ ചൈതന്യ- സമാന്ത വേർപിരിയലിനെക്കുറിച്ച് അമല ഇതുവരെ പ്രതികരിച്ചിട്ടില്ല. നാഗാർജുന കുടുംബത്തെ ഈ വേർപിരിയൽ ഏറെ ബാധിച്ചിരുന്നു എന്നായിരുന്നു റിപ്പോർട്ടുകൾ. അതേസമയം സമാന്തയും നാഗചൈതന്യയും ഇപ്പോൾ കരിയറിന്റെ തിരക്കുകളിലാണ്. നാഗാർജുനയുടെ ആദ്യ ഭാര്യ ലക്ഷ്മി ദഗുബതിയാണ് നാഗചൈതന്യയുടെ അമ്മ.