അയോദ്ധ്യ രാമക്ഷേത്ര പ്രതിഷ്ഠാ ദിനവുമായി ബന്ധപ്പെട്ട് പ്രതികരണവുമായി സംവിധായകൻ അമൽ നീരദ് രംഗത്ത്. ബാബരി മസ്ജിദിന്റെ ചിത്രത്തിനൊപ്പം വി ഫോർ വാന്റേറ്റയിലെ വാക്കുകളും അമൽ നീരദ് പങ്കുവെച്ചു.
“നമ്മൾ നമ്മുടെ ആത്മാഭിമാനത്തെ തുച്ഛമായ വിലയ്ക്ക് വിൽക്കുന്നു. പക്ഷേ ശരിക്കും നമ്മുക്കുള്ളത് അത് മാത്രമാണ്. അതാണ് നമ്മുടെ മൌലികമായ ഉള്ളടക്കം. എന്നാൽ അതിനുള്ളിൽ നമ്മൾ സ്വതന്ത്രരാണ്.” എന്നാണ് അമൽ നീരദ് സോഷ്യൽ മീഡിയയിൽ കുറിച്ചത്.
നേരത്തെ ഡോ. ബി. ആർ അംബേദ്കറുടെ പ്രസംഗം പങ്കുവെച്ചുകൊണ്ട് ഷെയ്ൻ നിഗം തന്റെ നിലപാടറിയിച്ചിരുന്നു. പഴയ ശത്രുക്കൾ പുതിയ രൂപത്തിൽ വരുമെന്നും, അവർ വിശ്വാസത്തിനു മുകളിൽ രാഷ്ട്രത്തെ സ്ഥാപിക്കുമോ അതോ രാഷ്ട്രത്തിനു മുകളിൽ അവരുടെ വിശ്വാസത്തെ സ്ഥാപിക്കുമോ എന്നുമുള്ള ഡോ. അംബേദ്കറുടെ പ്രസംഗമാണ് ഷെയ്ൻ നിഗം പങ്കുവെച്ചത്.
ഭരണഘടനയുടെ ആമുഖം പങ്കുവെച്ചാണ് മലയാള സിനിമ താരങ്ങളായ പാർവതി തിരുവോത്ത്, റിമ കല്ലിങ്കൽ, ദിവ്യ പ്രഭ, ആഷിഖ് അബു, ദർശന രാജേന്ദ്രൻ, ജിയോ ബേബി, കന്നി കുസൃതി, കമൽ കെ. എം, സൂരജ് സന്തോഷ് എന്നിവർ പ്രതികരിച്ചത്.