തെലുങ്ക് താരം അല്ലു അർജുനെതിരെ തിരഞ്ഞെടുപ്പ് ചട്ടലംഘനത്തിന് കേസ്. ലോക്സഭാ തിരഞ്ഞെടുപ്പ് ചട്ടം മറികടന്നുകൊണ്ട് ആൾക്കൂട്ടം സൃഷ്ടിച്ചു എന്നതിനാണ് കേസെടുത്തിരിക്കുന്നത്. വൈ.എസ്.ആർ കോൺഗ്രസ് എം.എൽ.എ രവി ചന്ദ്ര കിഷോറിനുമെതിരെയും കേസ് എടുത്തിട്ടുണ്ട്.
ആന്ധ്ര പ്രദേശിലെ നന്ദ്യാലയിലെ രവി ചന്ദ്രയുടെ വസതിയിൽ കഴിഞ്ഞ ദിവസം അല്ലു അർജുൻ എത്തിയിരുന്നു. എം.എൽ.എയെ സന്ദർശിക്കാനെത്തിയപ്പോൾ അല്ലുവിനെ കാണാൻ ആയിരകണക്കിന് ആരാധകരാണ് വസതിക്ക് കാത്തു നിന്നത്.
അല്ലു അർജുന്റെ നിരവധി ചിത്രങ്ങളും വീഡിയോകളും സോഷ്യൽ മീഡിയ വഴി നിമിഷനേരം കൊണ്ട് പ്രചരിക്കുകയും ചെയ്തിരുന്നു. രവി ചന്ദ്രയെ കാണാനെത്തിയ വിവരം അല്ലു അർജുൻ തന്നെ സോഷ്യൽ മീഡിയയിലൂടെ അറിയിച്ചിരുന്നു.
അനുവാദമില്ലാതെ രവിചന്ദ്ര അല്ലു അർജുനെ ക്ഷണിക്കുകയും ഇത് വലിയ ആൾക്കൂട്ടത്തിനു കാരണമാവുകയും ചെയ്തതോടെയാണ് കേസെടുത്തത്.
ഇരുവർക്കുമെതിരെ നന്ദ്യാൽ പോലീസ് ആണ് തിരഞ്ഞെടുപ്പ് ചട്ടലംഘനത്തിന് കേസെടുത്തത്. സ്പെഷ്യൽ ഡെപ്യൂട്ടി തഹസിൽദാറുടെ പരാതിയിലാണ് നടപടി.