പ്രശസ്ത ബോളിവുഡ് താരം സൽമാൻ ഖാന്റെ സഹോദരൻ അര്ബാസ് ഖാനും സണ്ണി ലിയോണും ചേർന്ന് അഭിനയിക്കുന്ന ചിത്രം തെരേ ഇന്തസാർ ഡിസംബർ ഒന്നിന് റിലീസിന് ഒരുങ്ങുകയാണ്. റിലീസിന് മൂന്ന് ദിവസങ്ങൾ മാത്രം ശേഷിക്കെ ചിത്രത്തിന്റെ അണിയറ പ്രവർത്തകർക്ക് ലീഗൽ നോട്ടീസ്.
ചിത്രത്തിലെ ബാർബി ഗേൾ എന്ന ഗാനമാണ് പ്രശ്നത്തിന് ഇടയാക്കിയത്. ബാര്ബി പാവകള് നിര്മ്മിക്കുന്ന മാറ്റൽ എന്ന കമ്പനിയാണ് അനുവാദം കൂടാതെ ബാർബി എന്ന പ്രയോഗം ഗാനത്തിൽ ഉണ്ടെന്നു ചൂണ്ടി കാട്ടി നോട്ടീസയച്ചത്. ഗാനത്തിൽ “ഐ ആം എ സെക്സി ബാർബി” എന്ന പ്രയോഗം ബാർബി പാവകളെ ഉപയോഗിക്കുന്ന പ്രായത്തിലെ കുട്ടികൾക്ക് യോജിക്കുന്നില്ല എന്നതാണ് നിയമ നടപടിക്കു മുതിരാൻ കമ്പനിയെ പ്രേരിപ്പിച്ചത്.
ഗാന രംഗത്തിൽ പോൺ നായിക കൂടിയായ സണ്ണി ലിയോൺ ഭാഗമാകുന്നതിനെയും കമ്പനി ചോദ്യം ചെയ്തു. എന്നാൽ കോടതി സിനിമ അണിയറ പ്രവർത്തകർക്ക് ആശ്വാസമേകുന്ന നിലപാടാണ് സ്വീകരിച്ചത്. സിനിമയ്ക്ക് എതിരെ ഒരു നടപടിക്കും മുതിരേണ്ട കാര്യമില്ല എന്നാണ് കോടതി കമ്പനിയെ അറിയിച്ചിരിക്കുന്നത്.ഇതിന് ശേഷം യൂട്യൂബിൽ ഗാനത്തിൽ സെക്സി ബാർബി ഗേൾ എന്നതിനു പകരം സെക്സി ബേബി ഗേൾ എന്നാക്കി മാറ്റിയിട്ടുണ്ട്.
സ്വാതി ശർമയും ലിൽ ഗോലും ചേർന്ന് ആലപിച്ച ഗാനം ഷബീർ അഹമ്മദാണ് രചിച്ചത്. രാജീവ് വാലിയ സംവിധാനം ചെയുന്ന ചിത്രത്തിൽ വ്യത്യസ്ഥമായ ഗെറ്റപ്പിൽ ആയിരിക്കും സണ്ണി ലിയോൺ പ്രത്യക്ഷപ്പെടുക. അര്ബാസ് ഖാനാണ് നായകൻ.