ബോളിവുഡ് നടി സ്‌നേഹ ഉള്ളാലിന് ഐശ്വര്യറായ്‌യുമായുള്ള സാദൃശ്യം സിനിമാലോകത്ത് ചര്‍ച്ചയായിരുന്നു. 2005-ല്‍ റിലീസ് ചെയ്ത സല്‍മാന്‍ ഖാന്‍ ചിത്രം ലക്കി: നോ ടൈം ഫോര്‍ ലവ് എന്ന ചിത്രത്തിലൂടെയാണ് സ്‌നേഹ അഭിനയരംഗത്തേക്ക് എത്തിയത്. ഐശ്വര്യറായ്‌യുമായുള്ള പ്രണയത്തകര്‍ച്ചയ്ക്ക് ശേഷമാണ് ഈ ചിത്രത്തില്‍ സല്‍മാന്‍ വേഷമിട്ടത്.
അതിനാല്‍ മുന്‍കാമുകിയോട് സാമ്യമുള്ള നായികയെ സല്‍മാന്‍ മനഃപൂര്‍വം ചിത്രത്തില്‍ കാസ്റ്റ് ചെയ്തതാണെന്ന ഗോസിപ്പുകളാണ് പ്രചരിച്ചത്. ഈ സിനിമ പരാജയപ്പെട്ടത് സ്‌നേഹയുടെ കരിയറിനെ പ്രതികൂലമായി ബാധിച്ചു. പിന്നീട് രണ്ടു ബോളിവുഡ് സിനിമകളിലും തെന്നിന്ത്യന്‍ സിനിമകളിലും വേഷമിട്ടെങ്കിലും ഐശ്വര്യമായി താരതമ്യം ചെയ്യുന്നത് തുടര്‍ന്നതിനാല്‍ താരത്തിന് ശ്രദ്ധ നേടാനായില്ല.
എന്നാല്‍ ഇങ്ങനെ താരതമ്യം ചെയ്യപ്പെട്ടത് തന്റെ കരിയറിനെ ബാധിച്ചിരുന്നില്ല എന്നാണ് സ്‌നേഹ പറയുന്നത്. ഒരു പി.ആര്‍ ഏജന്‍സിയാണ് ഐശ്വര്യയുടെ പേരില്‍ മാര്‍ക്കറ്റ് ചെയ്തിരുന്നത്. അതവരുടെ തന്ത്രമായിരുന്നു എന്നും നടി ഐ.എ.എന്‍.എസിന് വാര്‍ത്ത ഏജന്‍സിയോട് പറഞ്ഞു. സല്‍മാന്‍ ഖാന്റെ സഹോദരി അര്‍പ്പിത വഴിയാണ് സ്‌നേഹ സിനിമയിലെത്തുന്നത്.
മസ്‌ക്കറ്റില്‍ ജനിച്ചു വളര്‍ന്ന നടി, മോഡലിംഗിനായി മുംബൈയിലേക്ക് താമസം മാറിയപ്പോഴാണ് അര്‍പ്പിതയെ പരിചയപ്പെടുന്നതും തുടര്‍ന്ന് സിനിമയിലേക്ക് എത്തുന്നതും. നേരത്തെ നടി സറീന്‍ ഖാന്‍ സിനിമയിലെത്തിയപ്പോഴും ഇത്തരത്തില്‍ പ്രചാരണങ്ങള്‍ നടന്നിരുന്നു. കത്രീനയുമായുള്ള പ്രണയത്തകര്‍ച്ചയ്ക്ക് പിന്നാലെ നടിയുമായി സാമ്യമുള്ള സറീനെ അടുത്ത സിനിമയില്‍ സല്‍മാന്‍ കാസ്റ്റ് ചെയ്തു എന്ന അഭ്യൂഹങ്ങളാണ് പ്രചരിച്ചത്.