ഫിഷ് കറി മീല്സ് കഴിക്കുന്ന വീഡിയോ പുറത്തുവന്നതോടെ ബോളിവുഡ് താരം രണ്ബിര് കപൂറിനെതിരെ കടുത്ത സൈബര് ആക്രമണം. രാമായണ സിനിമയ്ക്കായി രണ്ബിര് നോണ്വെജ് കഴിക്കുന്നത് നിര്ത്തിയിരുന്നു. ഇത് ലംഘിച്ചതാണ് നടനെതിരെ വിമര്ശനങ്ങള് ഉയരാന് കാരണമായിരിക്കുന്നത്. നെറ്റ്ഫ്ലിക്സിന്റെ ‘ഡൈനിങ് വിത്ത് കപൂര്സ്’ എന്ന ഷോയിലാണ് രണ്ബിര് മീന് കഴിക്കുന്ന രംഗമുള്ളത്.
രാജ് കപൂറിന്റെ 100-ാം ജന്മവാര്ഷികം ആഘോഷിക്കാനാണ് കപൂര് കുടുംബാംഗങ്ങള് ഒത്തുകൂടിയത്. നീതു കപൂര്, കരീന കപൂര്, കരിഷ്മ കപൂര്, റിമ ജെയിന്, സെയ്ഫ് അലി ഖാന് ഉള്പ്പെടെയുള്ളവര് വിരുന്നിന് എത്തിയിരുന്നു. ഫിഷ് കറി റൈസ്, ജംഗ്ലി മട്ടണ് തുടങ്ങിയ വിഭവങ്ങളാണ് ഇവര്ക്കായി വിളമ്പിയത്. രണ്ബിര് ഭക്ഷണം കഴിക്കുന്നതും വീഡിയോയില് കാണാം.
ഈ വീഡിയോ പുറത്തെത്തിയതോടെയാണ് നടനെതിരെ വിമര്ശനങ്ങള് ഉയര്ന്നത്. രണ്ട് വര്ഷം മുമ്പായിരുന്നു രാമായണ സിനിമയ്ക്ക് വേണ്ടി മദ്യപാനവും നോനോണ്വെജും പാര്ട്ടികളുമൊക്കെ രണ്ബിര് അവസാനിപ്പിച്ചത്. സിനിമയ്ക്ക് വേണ്ടി സസ്യാഹാരിയായി എന്ന് രണ്ബിര് തുറന്നു പറയുകയും ചെയ്തിരുന്നു.
നടന് മദ്യപാനവും പുകവലിയും നിര്ത്തിയെന്നും, ധ്യാനവും കര്ശനമായ സാത്വിക ഭക്ഷണ രീതികളും പിന്തുടരുന്നുവെന്നും റിപ്പോര്ട്ടുകളും എത്തിയിരുന്നു. എന്നാല് നോണ്വെജ് കഴിക്കുന്ന വീഡിയോ എത്തിയതോടെ ‘നിങ്ങളുടെ പിആര് ടീമിനെ പിരിച്ചുവിടൂ’ എന്നാണ് പലരും കമന്റ് ചെയ്തത്. പിആര് ടീം തെറ്റായ വിവരങ്ങള് നല്കി എന്നാണ് സോഷ്യല് മീഡിയയില് പലരും ആരോപിക്കുന്നത്.
അതേസമയം, രാമായണയുടെ ഒന്നാം ഭാഗം ചിത്രീകരണം പൂര്ത്തിയായിട്ടുണ്ട്. നിതീഷ് തിവാരി സംവിധാനം ചെയ്യുന്ന ചിത്രത്തില് സായ് പല്ലവിയാണ് സീതയായി വേഷമിടുന്നത്. കന്നഡ സൂപ്പര്താരം യാഷ് രാവണനായി വേഷമിടും. സണ്ണി ഡിയോള്, രവി ദുബെ, കാജല് അഗര്വാള്, രാകുല് പ്രീത് സിങ്, അരുണ് ഗോവില്, കുനാല് കപൂര് തുടങ്ങി നിരവധി താരങ്ങള് ചിത്രത്തില് എത്തുന്നുണ്ട്.