സംവിധായകന് അനുരാഗ് കശ്യപിനെ രൂക്ഷമായി വിമര്ശിച്ച് നിര്മ്മാതാവ് ഏക്ത കപൂര്. നെറ്റ്ഫ്ളിക്സ് സിഇഒ ടെഡ് സരോന്ഡസിനെ വിമര്ശിച്ച് സംസാരിക്കുന്നതിനിടെ നെറ്റ്ഫ്ളിക്സിന് ‘അമ്മായിയമ്മ-മരുമകള്’ (സാസ്-ബഹു) ഷോകള് ആരംഭിക്കാമായിരുന്നു എന്ന് പരിഹസിച്ചതിന് എതിരെയാണ് ഏക്ത രംഗത്തെത്തിയിരിക്കുന്നത്.
ഇത്തരത്തില് നിരവധി സീരിയലുകള് ഒരുക്കിയിട്ടുള്ള നിര്മ്മാതാവാണ് ഏക്ത കപൂര്. അതിനാല് തന്നെ അനുരാഗ് കശ്യപിന്റെ പേരെടുത്ത് പറയാതെ തന്റെ നീരസം പ്രകടിപ്പിച്ചിരിക്കുകയാണ് ഏക്ത. നിങ്ങളാണ് വലിയ മണ്ടന് എന്ന് പറഞ്ഞു കൊണ്ടുള്ള ഏക്തയുടെ ഇന്സ്റ്റഗ്രാം സ്റ്റോറിയാണ് ശ്രദ്ധ നേടുന്നത്.
”നിങ്ങളാണ് വലിയ മണ്ടന്.. ഇങ്ങനെയൊക്കെ പറഞ്ഞ് ഞാന് സ്മാര്ട്ട് ആണ്, കൂളാണ് എന്ന് കരുതണ്ട. നിങ്ങള്ക്ക് സ്വയം അവബോധമുണ്ടോ? സാസ്-ബഹു ഷോകള് ഇന്ത്യന് ജനവിഭാഗങ്ങള്ക്കിടയില് ഉണ്ടാക്കിയ സ്വാധീനത്തെ കുറിച്ച് (സ്ത്രീകള്ക്ക് എങ്ങനെ അംഗീകാരം ലഭിച്ചു) ചിക്കാഗോ ഗവേഷണം രേഖപ്പെടുത്തിയിട്ടുണ്ട്.”
”എന്നാല് എല്ലാവരെയും ഉള്ക്കൊള്ളുന്ന ലോകത്തെ കുറിച്ച് സംസാരിക്കുന്ന കലാകാരന്മാര് വാസ്തവത്തില് കൂടുതല് ക്ലാസിസ്റ്റ് ആണ്. നിങ്ങള്ക്ക് ഞങ്ങള്ക്കൊപ്പം ഇരിക്കാന് കഴിയില്ല, ഞങ്ങളാണ് നല്ലത് എന്ന മനോഭാവം ഉപേക്ഷിക്കണം” എന്നാണ് ഏക്ത പറയുന്നത്.
അതേസമയം, ‘സേക്രഡ് ഗെയിംസ് പുറത്തിറക്കാന് രണ്ട് വര്ഷം കൂടി കാത്തിരിക്കുമായിരുന്നു. പകരം മറ്റെന്തെങ്കിലും ജനപ്രിയമായത് ആദ്യ ഒറിജിനലായി തിരഞ്ഞെടുത്തേനെ’ എന്ന സരോന്ഡസിന്റെ പ്രസ്താവനയ്ക്കെതിരെ ആയിരുന്നു അനുരാഗ് കശ്യപ് രംഗത്തെത്തിയത്.
നെറ്റ്ഫ്ളിക്സ് ഇന്ത്യ രാജ്യത്ത് ആദ്യമായി പുറത്തിറക്കിയ സീരീസ് ‘സേക്രഡ് ഗെയിംസ്’ വിക്രമാദിത്യ മോട്വാനെയ്ക്കൊപ്പം സംവിധാനം ചെയ്തത് അനുരാഗ് കശ്യപ് ആയിരുന്നു. ‘കലയുമായി ബന്ധപ്പെട്ട കാര്യത്തില് ടെക്കികള് മണ്ടന്മാരാണെന്ന് എനിക്ക് അറിയാമായിരുന്നു. എന്നാല്, ടെഡ് സരോന്ഡസ് മണ്ടത്തരത്തിന്റെ നിര്വചനമാണെന്ന് അറിയില്ലായിരുന്നു’ എന്നാണ് സരോന്ഡസിനെ വിമര്ശിച്ച് അനുരാഗ് കശ്യപ് സോഷ്യല് മീഡിയയില് കുറിച്ചത്.