ലതാമങ്കേഷ്‌കറിനെ പോലും അമ്പരപ്പിക്കുന്ന ഗാനം കൊണ്ടാണ് രാണാഘട്ടിന്റെ വാനമ്പാടി രാണു മൊണ്ടാല്‍ സോഷ്യല്‍ മീഡിയയില്‍ താരമാകുന്നത്. തെരുവോര ഗായികയില്‍ നിന്ന് വളരെ പെട്ടെന്ന് തന്നെ സിനിമാ പിന്നണി ഗായികയിലേക്ക് രാണുവിന്റെ മേല്‍വിലാസം തന്നെ മാറ്റി മറിച്ചിരിക്കുകയാണ് അവരുടെ ശബ്ദമാധുര്യം. ഇപ്പോഴിതാ ബോളിവുഡില്‍ നിന്ന് മറ്റൊരു സന്തോഷകരമായ റിപ്പോര്‍ട്ട് കൂടി പുറത്തു വന്നിരിക്കുകയാണ്. സല്‍മാന്‍ ഖാന്‍ രാണുവിന് 55 ലക്ഷത്തിന്റെ വീട് സമ്മാനിച്ചെന്നാണ് വിവരം.
കൂടാതെ സല്‍മാന്റെ പുതിയ ചിത്രമായ ദബാങ്ങ് 3 ക്കു വേണ്ടി രാണുവിനെ കൊണ്ട് ഒരു പാട്ട് പാടിക്കാനും പദ്ധതിയുള്ളതായി റിപ്പോര്‍ട്ടുകളുകള്‍ പ്രചരിക്കുന്നുണ്ട്.
അതേസമയം, ബോളിവുഡില്‍ അരങ്ങേറ്റം കുറിച്ചിരിക്കുകയാണ് രാണു. നടനും സംഗീത സംവിധായകനും ഗായകനുമായ ഹിമേഷ് രഷാമിയയുടെ “ഹാപ്പി ഹാര്‍ഡി ആന്റ് ഹീര്‍” എന്ന ചിത്രത്തില്‍ “തേരി മേരി കഹാനി” എന്ന ഗാനമാണ് രാണു പാടിയിരിക്കുന്നത്.
“ഹാപ്പി ഹാര്‍ഡി ആന്റ് ഹീറിലെ തേരി മേരി കഹാനി എന്ന ഗാനം ദൈവിക ശബ്ദത്തിനുടമ രാണു മൊണ്ടലിനൊപ്പം റെക്കോര്‍ഡ് ചെയ്തു..എത്തിപ്പിടിക്കാന്‍ ധൈര്യമുണ്ടെങ്കില്‍ സ്വപ്നങ്ങള്‍ കൈയിലൊതുങ്ങും”, എന്നാണ് രാണു പാടുന്നതിന്റെ വീഡിയോ പങ്കു വച്ച് ഹിമേഷ് കുറിച്ചത്. നിരവധി പേരാണ് ഹിമേഷിനെയും രാണുവിനെയും അഭിനന്ദിച്ച് എത്തിയിരിക്കുന്നത്.