മണ്ടത്തരത്തിന്റെ നിര്വചനമാണ് നെറ്റ്ഫ്ളിക്സ് സിഇഒ ടെഡ് സരോന്ഡസ് എന്ന് സംവിധായകന് അനുരാഗ് കശ്യപ്. നെറ്റ്ഫ്ളിക്സ് ഇന്ത്യ രാജ്യത്ത് ആദ്യമായി പുറത്തിറക്കിയ സീരീസ് ‘സേക്രഡ് ഗെയിംസ്’ വിക്രമാദിത്യ മോട്വാനെയ്ക്കൊപ്പം സംവിധാനം ചെയ്തത് അനുരാഗ് കശ്യപ് ആയിരുന്നു. സീരിസിനെതിരെ ടെഡ് സരോന്ഡസ് നടത്തിയ പ്രസ്താവനയാണ് അനുരാഗ് കശ്യപിനെ ചൊടിപ്പിച്ചത്.
”സേക്രഡ് ഗെയിംസ് പുറത്തിറക്കാന് രണ്ട് വര്ഷം കൂടി കാത്തിരിക്കുമായിരുന്നു. പകരം മറ്റെന്തെങ്കിലും ജനപ്രിയമായത് ആദ്യ ഒറിജിനലായി തിരഞ്ഞെടുത്തേനെ” എന്നായിരുന്നു നിഖില് കാമത്തിന് നല്കിയ അഭിമുഖത്തില് സരോന്ഡസ് പറഞ്ഞത്. ഇതിനെതിരെയാണ് അനുരാഗ് കശ്യപ് രംഗത്തെത്തിയത്.
”അമ്മായിയമ്മ-മരുമകള് പോരുള്ളവയിലൂടെ ആരംഭിക്കണമായിരുന്നു, എങ്കില് നന്നായേനേ. ഇപ്പോള് അവര് അതല്ലേ ചെയ്യുന്നത്. കഥ പറച്ചിലിന്റെ കലയുമായി ബന്ധപ്പെട്ട കാര്യത്തില് ടെക്കികള് മണ്ടന്മാരാണെന്ന് എനിക്ക് അറിയാമായിരുന്നു. എന്നാല്, ടെഡ് സരോന്ഡസ് മണ്ടത്തരത്തിന്റെ നിര്വചനമാണെന്ന് അറിയില്ലായിരുന്നു.”
”അത് മനസിലാക്കി തന്നതില് സന്തോഷം. ഇപ്പോള് എല്ലാം ശരിയായി” എന്നാണ് അനുരാഗ് കശ്യപ് സരോന്ഡസിന്റെ പരാമര്ശത്തെ സംബന്ധിച്ച വാര്ത്തയുടെ സ്ക്രീന്ഷോട്ട് പങ്കുവച്ച് വിമര്ശിച്ചത്. അതേസമയം, 2018ല് ആണ് സേക്രഡ് ഗെയിംസിന്റെ ആദ്യ സീസണ് നെറ്റ്ഫ്ളിക്സില് സ്ട്രീം ചെയ്തത്.