നിങ്ങൾക്ക് ലഭിക്കുന്ന വിസ വ്യാജമല്ലെന്ന് തിരിച്ചറിയാൻ വഴികൾ നിർദ്ദേശിച്ച് യുഎഇ താമസ കുടിയേറ്റ വകുപ്പ്. വ്യാജ വിസ തിരിച്ചറിയാൻ മൊബൈൽ ആപ്ലിക്കേഷനും വെബ് സൈറ്റും ഒരുക്കിയാണ് യുഎഇ പുതിയ രീതികൾ ആവിഷ്കരിച്ചത്. നിരവധിപ്പേർ വ്യാജ വിസയാൽ വഞ്ചിക്കപ്പെടുന്ന സാഹചര്യത്തിലാണ് മുന്നറിയിപ്പ്. കൂടാതെ, വ്യാജ വെബ്സൈറ്റുകളുടെ വലയിൽ വീഴരുതെന്നും നിർദ്ദേശമുണ്ട്.
അന്താരാഷ്ട്ര ബിസിനസ്സ് ഹബ് എന്നതിനൊപ്പം വിനോദ സഞ്ചാരികളുടെ പ്രധാന സ്ഥലമായതിനാലും യുഎഇ പ്രത്യേക സംവിധാനങ്ങൾ ഒരുക്കുകയാണ്. രാജ്യത്ത് ഇപ്പോൾ വിദേശികളുടെ വൻ തിരക്കാണ് അനുഭപ്പെടുന്നത്. ദുബായ് അന്താരാഷ്ട്ര വിമാനത്താവളത്തിലൂടെ മാത്രം ദിവസേന 1,40,000 ത്തിൽപ്പരം ആളുകളാണ് രാജ്യത്തേക്ക് പ്രവേശിക്കുന്നത്. ഇത് മുതലാക്കി വിനോദ സഞ്ചാരികളേയും തൊഴിലന്വേഷകരേയും വഞ്ചിക്കാൻ നിരവധിപ്പേർ രംഗത്തിറങ്ങിയിട്ടുള്ള സാഹചര്യത്തിലാണ് യുഎഇയുടെ പുതിയ നീക്കം.
വിസ നമ്പറും, വിസ ലഭിച്ചതാർക്കാണോ ആ വ്യക്തിയുടെ പാസ്പോർട്ട് വിവരങ്ങളും ഉപയോഗിച്ച് വിസ വ്യാജമാണോ, അസ്സലാണോ എന്ന് മനസ്സിലാക്കാനാവുമെന്ന് അധികൃതർ പറഞ്ഞു. www.amer.ae എന്ന വെബ്സൈറ്റിൽ ജനറൽ എൻക്വയറി പേജിൽ പോയി, വിസ നമ്പർ, ജനന തീയതി, വിസയിലെ ചില വിവരങ്ങൾ എന്നിവ എന്റർ ചെയ്യുകയാണ് ഒരു മാർഗം. വിസ വ്യാജമല്ലെങ്കിൽ അതിന്റെ വിവരങ്ങൾ വെബ്സൈറ്റിൽ കാണാൻ സാധിക്കും. വിസയുടെ കാലാവധിയും അറിയാൻ കഴിയും. സമാന രീതിയിൽ ദുബായ് താമസ കുടിയേറ്റ വകുപ്പിന്റെ മൊബൈൽ ആപ്ലിക്കേഷനിലൂടെയും വിസ ഒറിജിനലാണോ എന്ന് മനസ്സിലാക്കാം.