വൻ തോതിൽ വിലയിളവും മറ്റു ഓഫറുകളും പ്രഖ്യാപിച്ചിട്ടും കാർ വിൽപ്പനയിലെ ഇടിവ് സെപ്റ്റംബർ മാസത്തിലും തുടർന്നു. ഇന്ത്യയിലെ ഏറ്റവും വലിയ കാർ നിർമാതാക്കളായ മാരുതിയുടെ വില്പനയിലാണ് ഏറ്റവും വലിയ ഇടിവ് രേഖപ്പെടുത്തിയത്. 2018 സെപ്റ്റംബർ മാസത്തെ അപേക്ഷിച്ച് ഈ സെപ്റ്റംബറിൽ വില്പന 32 .7 ശതമാനം കുറഞ്ഞു. കഴിഞ്ഞ സെപ്റ്റംബറിൽ കമ്പനി 162,290 കാറുകൾ വിറ്റപ്പോൾ ഈ സെപ്റ്റംബറിൽ അത് 122,640 ലേക്ക് ഇടിഞ്ഞു. കമ്പനിയുടെ ചരിത്രത്തിലെ തന്നെ ഏറ്റവും വലിയ ഇടിവാണ് സെപ്റ്റംബറിൽ രേഖപ്പെടുത്തിയത്.
ടാറ്റ മോട്ടോഴ്സിന്റെ വില്പന 49 .88 ശതമാനം കുറഞ്ഞു. കഴിഞ്ഞ സെപ്റ്റംബറിൽ 64,598 കാറുകൾ വില്പനയായ സ്ഥാനത്ത് ഈ സെപ്റ്റംബറിൽ അത് 32,376 ആയി താഴ്ന്നു. മഹീന്ദ്രയുടെ വില്പന 21 .23 ശതമാനം കണ്ട് കുറഞ്ഞു. ടൊയോട്ടയുടെ വില്പന 16.57 ശതമാനവും ഹ്യുണ്ടായിയുടേത് 8 .05 ശതമാനവും കുറഞ്ഞതായി കഴിഞ്ഞ മാസത്തെ വില്പന കണക്കുകൾ വ്യക്തമാക്കുന്നു.
എന്നാൽ കമ്പനികൾ വൻ ഡിസ്കൗണ്ടുകളും ഓഫറുകളൂം നൽകുന്നതിനാൽ ആഗസ്റ്റ് മാസത്തേക്കാൾ സെപ്റ്റമ്പറിലെ വില്പന ഭേദമാണെന്ന് കമ്പനികൾ പറയുന്നു. ഇത് പ്രതീക്ഷ നൽകുന്ന ഘടകമാണെന്ന് അവർ വ്യക്തമാക്കി. ഈ വര്ഷം അഗസ്റ്റിനെ അപേക്ഷിച്ച് സെപ്റ്റംബറിൽ 15.25 ശതമാനം വില്പന വർധിച്ചിട്ടുണ്ട്.