ഇലക്ട്രിക് കാർ വിപ്ലവത്തിന് തുടക്കം കുറിക്കാൻ വേണ്ടിയെത്തിയ ചെറു ഇലക്ട്രിക് കാർ ആയിരുന്നു എംജി മോട്ടോർസിന്റെ കോമെറ്റ്. 2023 മെയ് നാലിനാണ് ഇന്ത്യയിലെ മുൻനിര കാർ നിർമാതാക്കളായ എംജി മോട്ടോർസ് തങ്ങളുടെ ഇവി പുറത്തിറക്കിയത്. വളരെ ചുരുങ്ങിയ നാളുകൾ കൊണ്ട് ശ്രദ്ധേയമായ ഈ കുഞ്ഞൻ ഇവി വിൽപ്പനയുടെ കാര്യത്തിലും മുൻപന്തിയിലാണ്. കോമെറ്റ് ഇവിയുടെ സ്പെഷ്യൽ ഗെയിമർ എഡിഷൻ പുറത്തിറക്കിയിരിക്കുകയാണ് എംജി മോട്ടോർ ഇന്ത്യ.
മോർട്ടൽ എന്ന് അറിയപ്പെടുന്ന ഇന്ത്യയിലെ മുൻനിര ഗെയിമർമാരിൽ ഒരാളായ നമൻ മാത്തൂരുമായി സഹകരിച്ചാണ് ഈ വാഹനം രൂപകൽപ്പന ചെയ്ത് ഒരുക്കിയിരിക്കുന്നത്. എംജി കോമെറ്റ് ഇവി ഗെയിമർ എഡിഷന്റെ ഡിസൈനിംഗിൽ ഡാർക്ക് ആൻഡ് ലൈറ്റ് തീമുകൾക്കാണ് കൂടുതൽ മുൻഗണന കൊടുത്തിരിക്കുന്നത്. റീസൈക്കിൾ ചെയ്ത പ്ലാസ്റ്റിക് വസ്തുക്കൾ ഉപയോഗിച്ചാണ് കോമറ്റ് ഇവി ഗെയിമർ എഡിഷന്റെ എക്‌സ്റ്റീരിയർ നിർമ്മിച്ചിരിക്കുന്നത് എന്നതാണ് മറ്റൊരു പ്രതേകത.
ഇന്റീരിയറിലെ ക്യാബിൻ നിയോൺ ലൈറ്റുകൾ ഉപയോഗിച്ച് നവീകരിച്ചതായി കാണാം. സീറ്റുകളിലും സ്റ്റിയറിംഗ് വീലിലും കാണപ്പെടുന്ന നിയോൺ ഹൈലൈറ്റുകൾ ഒരു ഗെയിമിംഗ് അന്തരീക്ഷം സൃഷ്ടിക്കുകായും ചെയ്യുന്നു. വിവിധ ഇന്റീരിയർ ഘടകങ്ങളിൽ പ്രത്യേക ടെക്‌സ്ചർ മെറ്റീരിയലുകൾ ഉപയോഗിച്ചിട്ടുണ്ട്. 10.25 ഇഞ്ച് ഡ്രൈവർ ഡിസ്പ്ലേയും 10.25-ഇഞ്ച് ടച്ച്സ്‌ക്രീൻ ഇൻഫോടെയ്ൻമെന്റ് സ്‌ക്രീനും അടങ്ങുന്ന ഡ്യുവൽ സ്‌ക്രീൻ കോമറ്റിൽ തുടർന്നും ലഭിക്കും. ഗെയിമിംഗും ഓട്ടോമോട്ടീവ് രംഗവും ഒരുമിച്ച് കൊണ്ടു വരാനാണ് എംജിയും മോർട്ടലും തമ്മിലുള്ള സഹകരണത്തിലൂടെ ലക്ഷ്യമിടുന്നത്.
ഗെയിമിങ്ങിലാണ് നിങ്ങളുടെ ലോകമെങ്കിൽ എംജി കോമെറ്റ് ഇവിയുടെ ഈ സ്പെഷ്യൽ പതിപ്പ് സാധാരണ വേരിയന്റുകളേക്കാൾ 65,000 രൂപ അധികം നൽകി നിങ്ങൾക്ക് സ്വന്തമാക്കാം. 8.63 ലക്ഷം രൂപ മുതലാണ് കോമറ്റ് ഇവിയുടെ ഗെയിമർ എഡിഷന്റെ എക്‌സ്-ഷോറൂം വില ആരംഭിക്കുന്നത്. എംജിയുടെ ഔദ്യോഗിക വെബ്സൈറ്റിൽ നിന്നോ രാജ്യത്തെ അടുത്തുള്ള ഏതെങ്കിലും ഷോറൂം സന്ദർശിച്ചോ കോമെറ്റ് ഇവി ഗെയിമർ എഡിഷൻ ബുക്ക് ചെയ്യാൻ സാധിക്കുന്നതാണ്.