ഇലക്ട്രിക് സൈക്കിൾ കൺസെപ്റ്റ് അവതരിപ്പിച്ച് ഹോണ്ട. ‘ഇ-എംടിബി’ എന്ന പേരിൽ ടോക്കിയോയിൽ നടന്ന ജപ്പാൻ മൊബിലിറ്റി ഷോയിലാണ് ഹോണ്ട ഇലക്ട്രിക് സൈക്കിൾ അവതരിപ്പിച്ചത്. ഇ-ബൈക്കുകളുടെ പ്രചാരം വർധിച്ചുവരുന്ന ഒരു കാലഘട്ടമാണിത്. അതിനാൽ ഹോണ്ടയുടെ ഈ ഇലക്ട്രിക് സൈക്കിളും വിപണിയിൽ ഉടൻ തന്നെ എത്തുമെന്നാണ് കരുതുന്നത്.
ഇലക്ട്രിക് സൈക്കിൾ വിപണിയിലെ വിപണന സാധ്യത മുതലെടുക്കുക എന്ന ലക്ഷ്യത്തിലാണ് ഇ-എംടിബിയെ ഹോണ്ട അവതരിപ്പിച്ചിരിക്കുന്നത്. ഈ ഇലക്ട്രിക് സൈക്കിളിലൂടെ ഒരേസമയം മോട്ടോർ സൈക്കിൾ, മൗണ്ടൻ ബൈക്ക് എന്നിവ ഓടിക്കുന്നത് ആസ്വദിക്കാൻ സാധിക്കുമെന്നാണ് ഹോണ്ട പറയുന്നത്. ബുദ്ധിമുട്ടേറിയ മലമ്പാതകളിലൂടെ ഏതൊരാൾക്കും അനായാസം ഈ സൈക്കിൾ ഓടിക്കാൻ സാധിക്കും.
വിപണിയിലുള്ള ബ്രോസിന്റെ മിട ഡ്രൈവ് മോട്ടോർ ആണ് ഹോണ്ട ഇ-എംടിബിയിൽ നൽകിയിരിക്കുന്നത്. ഈ ഇലക്ട്രിക് സൈക്കിളിന്റെ ഡിസൈനിലും ഫീച്ചറുകളിലുമാണ് ഹോണ്ട കൂടുതൽ ശ്രദ്ധ കൊടുത്തിരിക്കുന്നത്. ഇ ബൈക്കുകളിൽ ഉപയോഗിക്കുന്ന പല ഭാഗങ്ങളും ഇ-എംടിബിയിൽ ഉപയോഗിച്ചിട്ടുണ്ട്.
ഡിടി സ്വിസ് എക്സ്എം 1700 വീല്, മാക്സിസ് മിനിയോണ് ഡിഎച്ച്എഫ് ടയര്, മുന്നിലും പിന്നിലും ഫോക്സ് സസ്പെൻഷൻ, ഷിമാനോയുടെ ഹൈഡ്രോളിക് ഡിസ്ക് ബ്രേക്ക്, റോക്ഷോക്ക് റീവെര്ബ് ഡ്രോപ്പര് സീറ്റ് പോസ്റ്റ്, SRAM ഈഗിള് AXS ഗിയര്ബോക്സ് എന്നിവയാണ് ഹോണ്ടയുടെ പുതിയ ഇ- സൈക്കിളിലുള്ളത്. അനായാസമായി കുത്തനെയുള്ള കയറ്റങ്ങളിലും മറ്റ് ബുദ്ധിമുട്ടേറിയ സ്ഥലങ്ങളിലും ഉപയോഗിക്കാൻ സാധിക്കുന്ന രീതിയിലാണ് ഹോണ്ട ഈ മൗണ്ടൻ ടെറൈൻ ബൈക്ക് ഡിസൈൻ ചെയ്തിരിക്കുന്നത്.
ബ്രാൻഡ് വിപുലീകരിക്കാൻ സഹായിക്കുന്ന ഒരു വിപണിയാണ് ഇലക്ട്രിക് ബൈക്കുകൾ. ഈ സാധ്യത അന്വേഷിക്കുന്ന ഒരേയൊരു മോട്ടോർ സൈക്കിൾ നിർമ്മാതാവ് ഹോണ്ടയല്ല. സീരിയൽ 1 എന്ന പേരിൽ ഹാർലി-ഡേവിഡ്സൺ ഒരു ഇലക്ട്രിക് സൈക്കിൾ അവതരിപ്പിച്ചിരുന്നു. Greyp, Fazua എന്നീ കമ്പനികളെ സ്വന്തമാക്കി പോർഷെയും ഇലക്ട്രിക് സൈക്കിൾ രംഗത്തേക്ക് വരാൻ ഒരുങ്ങുണ്ട്.
കുറഞ്ഞ ചിലവിൽ ദൈനംദിന യാത്രകൾ പോകാം എന്നതിനാൽ വൈദ്യുത വിഭാഗത്തിൽ ഇലക്ട്രിക് സ്കൂട്ടറുകൾക്കാണ് ഏറെ ഡിമാൻഡ്. എന്നാൽ ഈ രംഗത്ത് അധികമാരും ശ്രദ്ധിക്കാത്തവരാണ് ഇലക്ട്രിക് സൈക്കിളുകളുടേത്. അധിക ദൂരം ചവിട്ടേണ്ട, ചെറിയ ദൂരങ്ങളിലേക്ക് വൈദ്യുതി ഉപയോഗിച്ച് എത്തിച്ചേരാം എന്നതെല്ലാം ഇലക്ട്രിക് സൈക്കിളുകളെ ഇത്തരക്കാർക്കിടയിൽ ജനപ്രിമാക്കി മാറ്റി കഴിഞ്ഞിരിക്കുകയാണ്.
ഒരു പുതിയ ഇലക്ട്രിക് സ്കൂട്ടർ വാങ്ങുന്നതിന്റെ പകുതി കാശുണ്ടെങ്കിൽ ഇത്തരം സൈക്കിളുകൾ വാങ്ങാനാവും. കൂടെ ആരോഗ്യവും നിലനിർത്താം. ഈയിടെയായി നിരവധി മോഡലുകളാണ് നമ്മുടെ വിപണിയിലേക്ക് കടന്നു വന്നുകൊണ്ടിരിക്കുന്നത്. ആ നിരയിലേക്കാണ് ഇപ്പോൾ ഹോണ്ടയുടെ ഇലക്ട്രിക് സൈക്കിളിലും എത്തുന്നത്.