കോവിഡ് -19 പകർച്ചവ്യാധി തുടങ്ങിയത് മുതൽ ഒരു ദശലക്ഷത്തിലധികം ആളുകൾ പുകവലി ഉപേക്ഷിച്ചുവെന്ന് ചാരിറ്റി ആക്ഷൻ ഓൺ സ്മോക്കിംഗ് ആന്റ് ഹെൽത്ത് (ആഷ്) സർവേ സൂചിപ്പിക്കുന്നു. പുകവലി ഉപേക്ഷിക്കുന്നവരുടെ എണ്ണത്തിൽ ഒരു ദശകത്തിനിടെയിലെ ഏറ്റവും ഉയർന്ന തോതാണ് രേഖപ്പെടുത്തിയതെന്നുമാണ് ബി.ബി.സി റിപ്പോർട്ട്.
കഴിഞ്ഞ നാല് മാസങ്ങളിൽ പുകവലി ഉപേക്ഷിച്ചവരിൽ 41% പേർ കൊറോണ വൈറസ് പടർന്നതു മൂലമാണ് പുകവലി നിർത്തിയതെന്ന് അഭിപ്രായപ്പെട്ടു. 2007 ൽ സർവേ ആരംഭിച്ചതിനു ശേഷം മറ്റേത് വർഷത്തേക്കാളും ഈ വർഷം 2020 ജൂൺ വരെ കൂടുതൽ ആളുകൾ പുകവലി ഉപേക്ഷിച്ചതായി യൂണിവേഴ്സിറ്റി കോളജ് ലണ്ടൻ (യുസിഎൽ) മറ്റൊരു സർവേയിൽ കണ്ടെത്തി.
പുകവലി കൂടുതൽ ഗുരുതരമായ കോവിഡ് ലക്ഷണങ്ങൾക്ക് കാരണമാകും എന്നാണ് വിദഗ്ദ്ധരുടെ ഉപദേശം. ഏപ്രിൽ 15- നും ജൂൺ 20- നും ഇടയിൽ, ആഷിനെ പ്രതിനിധീകരിച്ച് പോൾസ്റ്റർ യൂഗോവ് 10,000 പേരോട് അവരുടെ പുകവലി ശീലത്തെ കുറിച്ച് ചോദിച്ചു. യുകെയിൽ പുകവലി ഉപേക്ഷിക്കുന്ന മൊത്തം ആളുകളുടെ എണ്ണം കണക്കാക്കാൻ ഈ ഫലങ്ങൾ ഉപയോഗിച്ചു.
കഴിഞ്ഞ നാല് മാസത്തിനിടെ പുകവലി ഉപേക്ഷിച്ചവരിൽ പകുതിയിൽ താഴെ ആളുകൾ തങ്ങളുടെ തീരുമാനത്തിൽ കൊറോണ വൈറസ് പകർച്ചവ്യാധി പങ്കു വഹിച്ചിട്ടുണ്ടെന്ന് പറഞ്ഞു. ആരോഗ്യപരമായ ആശങ്കകൾ, ലോക്ക്ഡൗൺ സമയത്ത് പുകയിലയുടെ ലഭ്യത കുറവ്, ഒത്തുചേർന്നുള്ള പുകവലി ഇല്ലാതായത് എന്നിങ്ങനെ നിരവധി ഘടകങ്ങൾ ഇതിന് കാരണമായിട്ടുണ്ട്.
പുകവലി ടൂൾകിറ്റ് പഠനത്തിന്റെ ഭാഗമായി ലണ്ടൻ യൂണിവേഴ്സിറ്റി കോളജിലെ ഒരു സംഘം 2007 മുതൽ ഇംഗ്ലണ്ടിൽ ഒരു മാസം 1,000 ആളുകളോട് അവരുടെ പുകവലി ശീലത്തെ കുറിച്ച് ചോദിക്കുന്നു. ഈ വർഷം 2020 ജൂൺ വരെ, സർവേയിൽ പങ്കെടുക്കുന്ന 7.6% പുകവലിക്കാർ പുകവലി നിർത്തി – ശരാശരിയേക്കാൾ ഏകദേശം മൂന്നിലൊന്ന് ഉയർന്നതും ഒരു ദശകത്തിന് മുമ്പ് സർവേ ആരംഭിച്ചപ്പോൾ മുതൽ ഉള്ള ഏറ്റവും ഉയർന്ന കണക്കുമാണിത്.