എല്ലാ വീടുകളിലും വളരെ സുലഭമായി കണ്ടു വരുന്ന, ആരോഗ്യത്തിന് പല തരത്തിലുള്ള ഗുണങ്ങൾ നൽകുന്ന ഒന്നാണ് ജീരകം. നല്ല മണവും ഗുണവുമുള്ള ജീരകം ഇന്ത്യൻ പാചക രീതികളിൽ ഏറ്റവും പ്രധാനമായി ചേർക്കുന്ന ഒരു ചേരുവ കൂടിയാണ്. മിക്ക വീടുകളിലും ജീരക വെള്ളം കുടിക്കാനും ഉപയോഗിക്കാറുണ്ട്. ഇതൊരു ഡീടോക്സ് പാനീയമാണ്. ശരീരഭാരം കുറയ്ക്കാനും ജീരക വെള്ളത്തിന് സാധിക്കുമെന്നതാണ് മറ്റൊരു പ്രത്യേകത.
വളരെ വേഗത്തിലും ആരോഗ്യകരമായ രീതിയിലും അമിതവണ്ണം കുറയ്ക്കാൻ സഹായിക്കുന്ന ജീരക വെള്ളത്തിന് ശരീരത്തിൽ അടിഞ്ഞ് കൂടുന്ന ചീത്ത കൊളസ്ട്രോൾ കളയാനുള്ള കഴിവുമുണ്ട്. ദഹന പ്രശ്നങ്ങൾക്കുള്ള പരമ്പരാഗതമായ പരിഹാരം കൂടിയാണ് ജീരകം. ശക്തമായ മണവും സ്വാദും ഉള്ള ജീരകം കുടലിന്റെ ആരോഗ്യത്തിന് വളരെയധികം നല്ലതാണ്. ദഹനപ്രക്രിയയെ സഹായിക്കുന്ന പാൻക്രിയാറ്റിക് എൻസൈമുകളെ ഇത് പ്രോത്സാഹിപ്പിക്കുന്നു. ജീരകത്തിൽ അടങ്ങിയിരിക്കുന്ന തൈമോൾ എന്ന സംയുക്തം ഉമിനീർ ഗ്രന്ഥികളെ ഉത്തേജിപ്പിക്കുന്നു.
കുടലിന്റെ സുഗമമായ പ്രവർത്തനത്തിനായി കൊഴുപ്പ്, പഞ്ചസാര, പ്രോട്ടീനുകൾ തുടങ്ങിയ സങ്കീർണ്ണമായ പോഷകങ്ങളുടെ തകർച്ച പ്രോത്സാഹിപ്പിക്കുന്നതിലൂടെ ഇത് ദഹനപ്രക്രിയയെ കൂടുതൽ സുഗമമാക്കുന്നു. ഇത് ദഹനക്കേട്, വയറിളക്കം, ഓക്കാനം തുടങ്ങിയ പ്രശ്നങ്ങളെ ചെറുക്കാൻ സഹായിക്കുന്നു.
പൊതുവെ ജീരകത്തിൽ അടങ്ങിയിരിക്കുന്ന കലോറി വളരെ കുറവാണ്. ഏകദേശം 20 മുതൽ 21 ഗ്രാം വരെയുള്ള ഒരു ടീസ്പൂൺ ജീരകത്തിൽ എട്ട് കലോറി അടങ്ങിയിട്ടുണ്ട്. ജീരകവെള്ളം കുടിക്കുന്നത് അധിക കലോറികൾ ചേർക്കാതെ തന്നെ ധാരാളം ആരോഗ്യ ആനുകൂല്യങ്ങൾ നൽകും. പച്ചക്കറികൾ കഴിക്കുമ്പോൾ വറുത്ത ജീരകം ചേർക്കുന്നതും പല തരത്തിലുള്ള ഗുണങ്ങളാണ് നൽകുന്നത്. വേഗത്തിൽ കൊഴുപ്പിനെ എരിയിച്ച് കളയാനും ഇത് സഹായിക്കും. ഉയർന്ന മെറ്റബോളിസത്തെ പ്രോത്സാഹിപ്പിക്കുന്ന ഒരു ചേരുവ കൂടിയാണിത്.
മെറ്റബോളിസത്തെ ത്വരിതപ്പെടുത്തുന്ന വൈറ്റമിനുകളുടെയും ധാതുക്കളുടെയും സമ്പന്നമായ ഉറവിടമാണ് ജീരകം, ഇത് ശരീരത്തെ കൂടുതൽ കലോറി കത്തിക്കാൻ സഹായിക്കുന്നു. വയറുവീക്കം, അസിഡിറ്റി, ദഹനക്കേട് തുടങ്ങിയ പല പ്രശ്നങ്ങളെയും സുഖപ്പെടുത്താൻ കഴിവുള്ള ഔഷധമാണ് ജീരകം. പലതരം ആൻറി-ഇൻഫ്ലമേറ്ററി, ആൻറി ഓക്സിഡൻ്റ് ഗുണങ്ങളും ജീരകത്തിൽ അടങ്ങിയിട്ടുണ്ട്. ശരീരത്തിലെ വിഷാംശം പുറന്തള്ളാൻ സഹായിക്കുന്നതാണ് ജീരകം. ഇത് നാരുകളുടെ സമ്പന്നമായ ഉറവിടമായതിനാൽ, ജീരകം കഴിക്കുന്നത് വായുവിൻ്റെ പ്രശ്നങ്ങൾ ഒഴിവാക്കാൻ സഹായിക്കും.
മാനസിക സമ്മർദ്ദത്തെ നേരിടാൻ ജീരകത്തിൻറെ ഉപയോഗം ശരീരത്തെ സഹായിക്കുന്നുവെന്നാണ് പറയുന്നത്. ജീരകം ഒരു ആന്റി ഓക്സിഡന്റായി പ്രവർത്തിച്ച് സമ്മർദ്ദമുണ്ടാക്കുന്ന ഫലങ്ങളെ ചെറുക്കുമെന്നാണ് കണ്ടെത്തൽ. അതേസമയം, ഭക്ഷണത്തിൽ ജീരകം ഉൾപ്പെടുത്തുന്നത് മിക്കവർക്കും സുരക്ഷിതമായിരിക്കും. എന്നാൽ ചില ആളുകൾക്ക് ജീരകത്തോട് അലർജിയുണ്ടാകാം. ഇത്തരക്കാർക്ക് ജീരകത്തിന്റെ സത്ത് കഴിച്ച ശേഷം ഓക്കാനം, തലകറക്കം, വയറുവേദന എന്നിവ അനുഭവപ്പെടാറുണ്ട്.