ഉത്തര്പ്രദേശിലെ ഹത്രാസില് കൂട്ടബലാത്സംഗത്തില് കൊല്ലപ്പെട്ട ദളിത് പെണ്കുട്ടിയുടെ വീട് സന്ദര്ശിക്കാനുള്ള യാത്രക്കിടെ നാല് പേരെ പൊലീസ് അറസ്റ്റ് ചെയ്തു. മലപ്പുറം സ്വദേശിയായ മാധ്യമ പ്രവർത്തകൻ സിദ്ധിഖാണ് യു പി പൊലീസിന്റെ പിടിയിലായവരില് ഒരാള്. കേരള പത്രപ്രവർത്തക യൂണിയൻ ഡൽഹി ഘടകം സെക്രട്ടറിയുമാണ് സിദ്ധിഖ്.
മലപ്പുറം സ്വദേശി സിദ്ധിഖിന് പുറമെ, മുസഫര് നഗര് സ്വദേശി ആതിഖ് ഉര് റഹമാന്, ബറിയാച്ച് സ്വദേശി മസൂദ് അഹമ്മദ്, റാംപൂര് സ്വദേശി ആലം എന്നിവരാണ് പിടിയിലായത്. മഥുരയിലെ മത് ടോള് പ്ലാസയില് വെച്ചാണ് ഇവരെ പിടികൂടിയത്. ഇവർ പോപ്പുലർ ഫ്രണ്ട് പ്രവർത്തകരാണെന്ന് മഥുര പൊലീസ് പറഞ്ഞു. സംശയകരമായ ബന്ധങ്ങളുള്ള ചിലര് ഡല്ഹിയില് നിന്നും ഹത്രാസിലേക്ക് പുറപ്പെട്ടിട്ടുണ്ടെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു വാഹന പരിശോധന നടത്തിയത്.
ഇവരുടെ പക്കൽ നിന്നും മൊബൈല് ഫോണുകള്, ലാപ്ടോപ്പ്, ലഘുലേഖകള് തുടങ്ങിയവ പിടിച്ചെടുത്തു. പിടിച്ചെടുത്ത ലഘുലേഖകള് സാമുദായിക അന്തരീക്ഷം തകര്ക്കാന് കഴിയുന്നതാണെന്ന് യു പി പൊലീസ് പറയുന്നു. മൗലികവാദ ഗ്രൂപ്പായ പോപ്പുലര് ഫ്രണ്ടുമായും കാമ്പസ് ഫ്രണ്ടുമായും ഇവര്ക്ക് അടുത്ത ബന്ധമുണ്ടെന്ന് ചോദ്യം ചെയ്യലില് വ്യക്തമായതായി പൊലീസ് സൂചിപ്പിക്കുന്നു. പോപ്പുലര് ഫ്രണ്ടിനെ ഉത്തര്പ്രദേശ് സര്ക്കാര് നേരത്തെ നിരോധിച്ചതാണ്.
അതേസമയം മാധ്യമ പ്രവർത്തകനെ അറസ്റ്റ് ചെയ്ത സംഭവത്തെ അപലപിച്ച് കെ.യു.ഡബ്ല്യുജെ രംഗത്തെത്തി. സിദ്ദിഖിനെ എത്രയും വേഗം മോചിപ്പിക്കണമെന്ന് ആവശ്യപ്പെട്ട് യു.പി, കേരള മുഖ്യമന്ത്രിമാര്ക്കും സംസ്ഥാന ഡി.ജി.പിമാര്ക്കും കെ.യു.ഡബ്ല്യുജെ പരാതി നല്കി.
സെപ്റ്റംബര് 14- നാണ് 19 കാരിയായ ദളിത് പെണ്കുട്ടിയെ അക്രമികള് കൂട്ടബലാത്സംഗം ചെയ്യുകയും ക്രൂരമായി പീഡിപ്പിക്കുകയും ചെയ്തത്. അതീവ ഗുരുതരാവസ്ഥയിലായ പെണ്കുട്ടി ഡല്ഹിയില് ചികില്സയിലിരിക്കെ മരിച്ചു. പെണ്കുട്ടിയുടെ മൃതദേഹം വീട്ടുകാരുടെ സമ്മതമില്ലാതെ യുപി പൊലീസ് രാത്രി തന്നെ സംസ്കരിച്ചതും വിവാദമായിരുന്നു. കേസ് ഒതുക്കാനുള്ള യുപി സര്ക്കാരിന്റെ ശ്രമങ്ങള്ക്കെതിരെ രാജ്യവ്യാപകമായി വന് പ്രതിഷേധമാണ് നടക്കുന്നത്.