ആര്ട്ടിഫിഷ്യല് ഇന്റലിജന്സ് (ഐഎ) സാങ്കേതിക വിദ്യയെ മലയാളം ഉള്പ്പെടെയുള്ള പ്രാദേശിക ഭാഷകളില് ഉപയോഗിക്കാവുന്ന വെബ് അധിഷ്ഠിത ആപ്ലിക്കേഷന് അവതരിപ്പിച്ച് ശ്രദ്ധ നേടി ട്രിഡ്സ് (Tridz) സ്റ്റാര്ട്ടപ്. ഐഎയെ ഇംഗ്ലീഷ് ഭാഷയുടെ ചട്ടക്കൂടില് നിന്ന് പുറത്തുകൊണ്ടുവന്ന് പ്രാദേശികമാക്കിയതിന് പിന്നില് ഒരു കൂട്ടം മലയാളി ചെറുപ്പക്കാരാണെന്നതാണ് ശ്രദ്ധേയം.
കോഴിക്കോടും ബംഗളൂരുവുമായി പ്രവര്ത്തിക്കുന്ന കമ്പനിയുടെ ഇന്ഡിക്എഐ (indicai.in) വെബ്സൈറ്റിലൂടെ ഇന്ത്യയിലെ ഏതു പ്രാദേശിക ഭാഷയിലും നമുക്ക് ആവശ്യമുള്ള വിവരങ്ങളും ചിത്രങ്ങളും എഐ ടൂള് ഉപയോഗിച്ച് സൃഷ്ടിച്ചെടുക്കാം. മെഷീന് ട്രാന്സ്ലേഷന്റെ സഹായത്തോടെയാണ് ഇത് സാധ്യമാവുന്നത്.
പ്രാദേശിക ഭാഷയില് നല്കുന്ന നിര്ദേശങ്ങളിലൂടെ എഐ ചിത്രങ്ങള് ജനറേറ്റ് ചെയ്യാന് സഹായിക്കുന്ന ആദ്യ വെബ്സൈറ്റാണ് ഇതെന്നാണ് കമ്പനി സ്ഥാപകനും സോഫ്റ്റ്വെയര് ആര്ക്കിടെക്ടുമായ സഫ്വാന് എരൂത്ത് അവകാശപ്പെടുന്നത്.
നിലവില് എഐ ടൂളികള് ജനറേറ്റ് ചെയ്യുന്ന ചിത്രങ്ങളും മറ്റും പാശ്ചാത്യ കേന്ദ്രീകൃതമാണെന്ന് കാണാം. ഇതിനെ മറികടന്ന് എഐ മോഡലുകളെ ഇന്ത്യന് പശ്ചാത്തല ഡേറ്റ ഉപയോഗിച്ച് നവീകരിക്കരിച്ചിരിക്കുകയാണ് ഇവര്.
രേഖാചിത്രം പോലുള്ളവ നിര്മിക്കാനും ഇതിലൂടെ സാധിക്കും. ഇന്ത്യയിലെ ഏതു ഭാഷയില് വേണമെങ്കിലും കുറ്റവാളിയുടെ രൂപം എ.ഐക്ക് പറഞ്ഞുകൊടുക്കാം. ലോഗിന് ചെയ്ത് ചെറിയ തുക നല്കി ഏതൊരാള്ക്കും സൈറ്റ് ഉപയോഗിക്കാം.
സഫ്വാനൊപ്പം സോഫ്റ്റ്വെയര് എന്ജിനീയര്മാരായ ഷെഹ്സാദ് ബിന് ഷാജഹാന്, മുനീബ് മുഹമ്മദ്, പ്രോഡക്ട് ഡിസൈനര് നിഹാല് എരൂത്ത് എന്നിവര് ചേര്ന്നാണ് ഈ നാടന് എഐ ആപ്ലിക്കേഷന് വികസിപ്പിച്ചെടുത്തിരിക്കുന്നത്.