വിലക്കുറവില് അത്ഭുതപ്പെടുത്തി മികച്ച ഫീച്ചറുകളോടെ ഫോണുകള് നിര്മ്മിക്കുന്നതില് ഇന്നു ലോകത്ത് ഏറ്റവും വിരുതുള്ള കമ്പനികളിലൊന്നാണ് ഷവോമി. ഷവോമിയുടെ റെഡ്മി സിരീസിലെ ഫോണുകള് വന് നേട്ടമാണ് വിപണിയില് കൊയ്തത്. ഇപ്പോഴിതാ റെഡ്മി സ്മാര്ട്ടി ടിവികളും വിപണിയിലെത്താന് ഒരുങ്ങുകയാണ്.
പുതിയ റെഡ്മി ടിവികള് അടുത്ത മാസം തന്നെ അവതരിപ്പിക്കുമെന്ന് ഷോമി പ്രൊഡക്ട് ഡയറക്ടര് വാങ് ടെങ് തോമസ് പറഞ്ഞു. 70 ഇഞ്ച് സ്ക്രീനും 40 ഇഞ്ച് സ്ക്രീനുമുള്ള രണ്ട് സ്മാര്ട് ടിവികളാണ് റെഡ്മിയില് നിന്ന് പ്രതീക്ഷിക്കുന്നത്. 70 ഇഞ്ച് 4 കെ റെസല്യൂഷന് ഡിസ്പ്ലേയുള്ള റെഡ്മി ടിവി എല് 70 എം 5-ആര്എ ഇതിനകം ചൈനയുടെ 3 സി സര്ട്ടിഫിക്കേഷന് വെബ്സൈറ്റില് ലിസ്റ്റ് ചെയ്തിട്ടുണ്ട്. മോഡല് നമ്പര് എല് 40 എം 5-ആര്എ ഉള്ള 40 ഇഞ്ച് റെഡ്മി ടിവി ഉണ്ടെന്നും അഭ്യൂഹങ്ങളുണ്ട്.
ഷവോമിയുടെ എംഐ സ്മാര്ട് ടിവികള് നിലവില് വിപണിയില് വില്ക്കപ്പെടുന്നുണ്ട്. എന്നാല് ടെലിവിഷന് വിപണിയെ കുറച്ചുകൂടി സജീവമാക്കാന് ലക്ഷ്യമിട്ടാണ് റെഡ്മിയുടെ സ്മാര്ട് ടിവിയും പുറത്തിറങ്ങുന്നത്. വിലക്കുറവില് ഞെട്ടിക്കുന്ന ഷവോമി അത്ഭുതം ഇവിടെയും ഉപഭോക്താക്കള് പ്രതീക്ഷിക്കുന്നുണ്ട്.