ഏഷ്യന് ഗെയിംസില് ചരിത്രം രചിച്ച് ഇന്ത്യ. ജാവലിന് ത്രോയില് സ്വര്ണവും വെള്ളിയും നേടി ഇന്ത്യ. ലോക ഒന്നാം നമ്പര് താരം നീരജ് ചോപ്ര സ്വര്ണവും നേടിയപ്പോള് ശക്തമായ പോരാട്ടത്തിലൂടെ കിഷോര് കുമാര് ജന വെള്ളി നേടി രണ്ടാം സ്ഥാനത്തെത്തി. 88.88 മീറ്റര് ദൂരം കണ്ടെത്തിയാണ് നീരജ് ചോപ്ര സ്വര്ണം നേടിയത്. ഇന്ത്യയുടെ മെഡല് നേട്ടം ഇതോടെ 81 ആയി.
മത്സരത്തില് നീരജിന്റെ ആദ്യ ശ്രമം സാങ്കേതിക പ്രശ്നങ്ങളെ തുടര്ന്ന് നഷ്ടമായി. രണ്ടാം ശ്രമത്തില് നീരജ് ചോപ്ര 84.49 മീറ്റര് എറിഞ്ഞു. തുടര്ന്ന് നീരജിന്റെ മൂന്നാം ശ്രമം ഫൗളായി. നാലാം ശ്രമത്തില് 88.88 മീറ്റര് ദൂരം എറിഞ്ഞാണ് നീരജ് സ്വര്ണം നേടിയത്. എന്നാല് കിഷോര് ജന തന്റെ മൂന്നാം ശ്രമത്തിലൂടെ 86.77 മീറ്റര് ദൂരം പിന്നിട്ട് നീരജിന് മുന്നിലെത്തിയിരുന്നു. നാലാം ശ്രമത്തില് ജന 87.54 മീറ്റര് ദൂരം കണ്ടെത്തിയെങ്കിലും നീരജിനെ മറികടക്കാനായില്ല.
അതേ സമയം 85.5 മീറ്ററെന്ന യോഗ്യത പരിധി മറികടന്നതോടെ കിഷോര് ജന പാരീസ് ഒളിംപിക്സിനും അര്ഹനായിട്ടുണ്ട്. ജാവലിന് ത്രോയില് മൂന്നാം സ്ഥാനത്തെത്തി വെങ്കലം നേടിയത് ജപ്പാനാണ്. പുരുഷന്മാരുടെ 4 x 400 മീറ്റര് റിലേയിലും ഇന്ത്യ സ്വര്ണം കരസ്ഥമാക്കി. അനസ് മുഹമ്മദ് യഹിയ, അമോജ് ജേക്കബ്, മുഹമ്മദ് അജ്മല്, രാജേഷ് രമേഷ് എന്നിവരുടെ സംഘമാണ് ഇന്ത്യയ്ക്കായി സ്വര്ണം നേടിയത്.