ഇംഗ്ലീഷ് പ്രീമിയര് ലീഗ് വമ്പന്മാരായ മാഞ്ചസ്റ്റര് യുണൈറ്റഡ്, മാഞ്ചസ്റ്റര് സിറ്റി എന്നീ ക്ലബ്ബുകള്ക്ക് ബൂട്ടണിഞ്ഞ അര്ജന്റീന മുന് സൂപ്പര് താരം കാര്ലോസ് ടെവസ് സ്വന്തം നാട്ടിലെ ബൊക്ക ജൂനിയേഴ്സില് ചേര്ന്നു. പ്രീമിയര് ലീഗിലും ഇറ്റാലിയന് ലീഗിലും പന്തുതട്ടിയ ടെവസ് പിന്നീട് ചൈനീസ് ക്ലബ്ബായ ഷാങ്ഹായ് ഷെന്ഹുവയിലെത്തിയിരുന്നു. എന്നാല്, ചൈനീസ് സൂപ്പര് ലീഗിലും താരത്തിന് കാര്യമായ നേട്ടമുണ്ടാക്കാന് സാധിച്ചില്ല.
തുടര്ന്ന് നാട്ടിലേക്ക് തിരിച്ച താരം ബൊക്കയുമായി കരാറിലെത്തുകയായിരുന്നു. അതേസമയം, ചൈനീസ് ലീഗില് കളിക്കുമ്പോള് താരത്തിന് ഭാഷ കൈകാര്യം ചെയ്യാനുള്ള ബുദ്ധിമുട്ടുണ്ടാവുകയും ചൈന മടുപ്പിക്കുകയും ചെയ്തിരുന്നു. അതോടെ, നാട്ടിലേക്ക് തിരിക്കാന് ക്ലബ്ബ് മാനേജ്മെന്റിനോട് അനുമതി ചോദിച്ച ടെവസിന് ആദ്യം അനുമതി നല്കിയില്ലെങ്കിലും പിന്നീട് സമ്മതം മൂളുകയായിരുന്നു.
ഷെന്ഹുവയില് താരം തൃ്പ്തനായിരുന്നില്ലെന്നും എത്രെയും പെട്ടെന്ന് നാട്ടിലേക്ക് തിരിക്കാന് താരം താല്പ്പര്യപ്പെടുകയും ചെയ്തിരുന്നുവെന്നും റിപ്പോര്ട്ടുകളുണ്ടായിരുന്നു. ഹോം സിക്ക് ടെവസിനെ യാത്രയാക്കുന്നുവെന്ന് പറഞ്ഞാണ് ചൈനീസ് ലീഗ് വിട്ടു അര്ജന്റീനയിലേക്ക് തിരിച്ച ടെവസിനെ ചൈനീസ് മാധ്യമങ്ങള് റിപ്പോര്ട്ട് ചെയ്തിരുന്നത്. ടീമില് കടുത്ത ഒറ്റപ്പെടല് അനുഭവിച്ചിരുന്നുവെന്ന് താരം സൂചന നല്കിയിരുന്നു.
തടികൂടിയതിന്റെ പേരില് ഇതിന് മുമ്പ് ടെവസിനെ ചൈനീസ് ക്ലബ് പുറത്താക്കിയിരുന്നു. തടികുറച്ച് മടങ്ങിവരാന് ടീം മാനേജര് ടെവസിനു ഉപദേശിച്ചിരുന്നുവെന്നും അന്ന് റിപ്പോര്ട്ടുകളുണ്ടായിരുന്നു.
ഷെന്ഹുവയുമായി ഒരു വര്ഷം കൂടി കരാര് ശേഷിക്കുന്നുണ്ടെങ്കിലും, പരിക്കും ഫോമില്ലായ്മയും താല്പര്യമില്ലാത്തതു പോലുള്ള പെരുമാറ്റവുമാണ് ടെവസിനെ ക്ലബ്ബ് വിടാന് അനുവദിച്ചതെന്നാണ് ഔദ്യോഗിക വിശദീകരണം. 2016-ല് ചൈനയിലെത്തിയ താരത്തിന് 16 സി.എസ്.എല് മത്സരങ്ങളില് നിന്ന് വെറും നാല് ഗോളേ നേടാന് കഴിഞ്ഞിരുന്നുള്ളൂ.