അർജന്റീനയുടെ എക്കാലത്തെയും മികച്ച ഫുട്ബോൾ കളിക്കാരിൽ മുൻപന്തിയിൽ നിൽക്കുന്ന താരമാണ് എയ്ഞ്ചൽ ഡി മരിയ. അർജന്റീനയ്ക്കായി ഖത്തർ ലോകകപ്പും, ഒരു ഫൈനലിസിമയും, രണ്ട് കോപ്പ അമേരിക്കൻ ട്രോഫികളും നേടുന്നതിൽ മുഖ്യ പങ്ക് വഹിച്ച താരമാണ് അദ്ദേഹം. ഈ വർഷത്തെ കോപ്പ അമേരിക്കൻ ട്രോഫി നേടിയതിന് പുറകെ താരം തന്റെ വിരമിക്കൽ പ്രഖ്യാപനം നടത്തിയിരുന്നു.
അടുത്ത മത്സരത്തിൽ ഡി മരിയയെ ആദരിക്കാൻ അർജന്റീന ഫുട്ബോൾ അസോസിയേഷൻ തീരുമാനിച്ചിട്ടുണ്ട്.
മാധ്യമങ്ങളുമായുള്ള ഒരു അഭിമുഖത്തിൽ വെച്ച് അർജന്റീനയുടെ ചരിത്രത്തിലെ ഏറ്റവും മികച്ച കളിക്കാർ ആരൊക്കെയാണ് എന്ന് താരത്തിനോട് ചോദിച്ചിരുന്നു. അതിന് രസകരമായ ഉത്തരമാണ് ഡി മരിയ തന്നത്. അദ്ദേഹത്തിന്റെ വാക്കുകൾ ഇപ്പോൾ സോഷ്യൽ മീഡിയ ഏറ്റെടുത്തിരിക്കുകയാണ്.
എയ്ഞ്ചൽ ഡി മരിയ പറയുന്നത് ഇങ്ങനെ:
”ഏറ്റവും മികച്ച അർജന്റീന താരങ്ങളുടെ പട്ടികയിൽ ഞാൻ ഒന്നാമതാണ് വരിക. കാരണം മെസ്സിയും മറഡോണയും മറ്റൊരു ഗ്രഹത്തിൽ നിന്നുള്ളവരാണ്. അവർ നമ്മുടെ കൂട്ടത്തിൽ പെട്ടവരല്ല. ലയണൽ മെസ്സിയോടൊപ്പം കളിക്കാൻ കഴിയുക, ഡിയഗോ മറഡോണക്ക് കീഴിൽ കളിക്കാൻ കഴിയുക, ഇതിനേക്കാൾ കൂടുതൽ മറ്റെന്തു വേണം, ഇതുതന്നെ ധാരാളം “ ഡി മരിയ പറഞ്ഞു.
അർജന്റീനാ ഡി മരിയയെ ആദരിക്കാൻ വേണ്ടിയുള്ള മത്സരം നടത്താൻ തീരുമാനിച്ചിട്ടുണ്ട്. പരിശീലകനായ ലയണൽ സ്കലോണിയുടെ നിർദേശ പ്രകാരമാണ് അസോസിയേഷൻ ഈ ചടങ്ങ് നടത്തുന്നത്. അർജന്റീനയുടെ ഏറ്റവും മികച്ച താരമാണ് എയ്ഞ്ചൽ ഡി മരിയ എന്ന് അദ്ദേഹം പറയുകയും ചെയ്തിരുന്നു. വിരമിക്കൽ പ്രഖ്യാപിച്ചെങ്കിലും ഡി മരിയ ഇപ്പോൾ ക്ലബായ ബെൻഫികയ്ക്ക് വേണ്ടി ആണ് കളിക്കുന്നത്.
