ഇന്നലെ ഇംഗ്ലീഷ് പ്രീമിയർ ലീഗിൽ നടന്ന മത്സരത്തിൽ ന്യൂകാസിൽ യുണൈറ്റഡിനെ തകർത്തെറിഞ്ഞ് ലിവർപൂൾ തകർപ്പൻ ജയം സ്വന്തമാക്കിയിരുന്നു. രണ്ടിനെതിരെ നാലു ഗോളുകൾക്കായിരുന്നു ടീമിന്റെ ജയം. കൂടുതൽ ഗോളുകൾക്ക് ജയിച്ചില്ലല്ലോ എന്ന് മാത്രം ആയിരിക്കും ലിവർപൂളിന് ഉള്ള സങ്കടം.
ലിവർപൂളിന്റെ മൈതാനമായ ആൻഫീൽഡിൽ വച്ചു കൊണ്ടായിരുന്നു ഈ മത്സരം നടന്നിരുന്നത്. ജയത്തോടെ പോയിന്റ് പട്ടികയിൽ ലീഡ് നിലനിർത്താനും ലിവർപൂളിനായി. എന്നാൽ മത്സരത്തിനിടെ യുർഗൻ ക്ലോപിന് വളരെയധികം വേദന കൊടുത്ത ഒരു സംഭവം ഉണ്ടായി. പരിശീലകന്റെ വിവാഹ മോതിരം മത്സരത്തിനിടെ നഷ്ടപ്പെട്ടു. ഇതോടെ താൻ ഭയന്ന് പോയെന്നും എന്നാൽ മോതിരം കിട്ടിയപ്പോഴാണ് ആശ്വാസം വന്നതെന്നും പരിശീലകൻ പറഞ്ഞു.
“വിവാഹ മോതിരം നഷ്ടപ്പെട്ടത് എനിക്ക് വലിയ ഞെട്ടൽ ഉണ്ടാക്കി. അത് തിരിച്ചുകിട്ടിയപ്പോഴാണ് എനിക്ക് ആശ്വാസം വന്നത്. മുമ്പും എനിക്ക് ഇതുപോലെ മോതിരം നഷ്ടം ആയിട്ടുണ്ട്,. ഒരു വലിയ കടലിൽ തന്നെയാണ് മോതിരം നഷ്ടമായത്. തിരിച്ചുകിട്ടിയത് ഭാഗ്യം. ഞാനിപ്പോൾ ഒന്നോ രണ്ടോ കിലോ ഭാരം കുറഞ്ഞിട്ടുണ്ട്. അതുകൊണ്ടുതന്നെ മോതിരത്തിന് ചെറിയ അയവ് സംഭവിച്ചിട്ടുണ്ട് ” ഇതാണ് മത്സരശേഷം ക്ലോപ് പറഞ്ഞിട്ടുള്ളത്.
ആരാധകരെ അഭിസംബോധനം ചെയ്യുന്ന സമയത്താണ് പരിശീലകന്റെ മോതിരം നഷ്ടമായത്. പിന്നീട് ക്യാമറാമാൻ അത് എവിടെയാണ് വീണതെന്ന് കാണിക്കുന്നുണ്ട്. അത് കിട്ടിയപ്പോൾ ഉള്ള പരിശീലകന്റെ മുഖഭാവവും വിഡിയോയിൽ കാണാൻ സാധിക്കും.