ഖത്തര്‍ ലോക കപ്പിലെ രണ്ടാം സെമിയില്‍ മൊറോക്കോയെ നേരിടാന്‍ തയ്യാറെടുക്കുന്ന ഫ്രാന്‍സിന് തിരിച്ചടിയായി സൂപ്പര്‍ താരങ്ങളുടെ ഫിറ്റ്നസ് പ്രശ്‌നം. പ്രതിരോധനിര താരം ഡെയോട്ട് ഉപമെകാനോ, മിഡ്ഫീല്‍ഡര്‍ റാബിയോട്ട് എന്നിവര്‍ സെമിയില്‍ ഫ്രാന്‍സിന്റെ ആദ്യ ഇലവനില്‍ ഇടം നേടാന്‍ സാദ്ധ്യതയില്ല.
ചൊവ്വാഴ്ച ഇവര്‍ പരിശീലനത്തിന് ഇറങ്ങിയില്ലെന്ന് ഫ്രഞ്ച് ഫുട്ബോള്‍ ഫെഡറേഷന്‍ അറിയിച്ചു. തൊണ്ടവേദനമാണ് ഉപമെകാനോയ്ക്ക് എന്നാണ് റിപ്പോര്‍ട്ട്. റാബിയോട്ടിന്റെ ശാരിരിക ബുദ്ധിമുട്ട് എന്തെന്ന് വ്യക്തമല്ല.
ഇരുവരും കളിക്കാതെ വന്നാല്‍ കൊനാറ്റെയെ സെന്റര്‍ ബാക്കായും ഫോഫാനയെ ഗ്രീസ്മാനും ഓറെലിയന്‍ ചൗമെനിയേയും ഫ്രാന്‍സ് ഇറക്കിയേക്കും. ഇംഗ്ലണ്ടിന് എതിരെ ഗോള്‍ നേടിയ ഓറെലിയന്‍ തിങ്കളാഴ്ച പരിശീലനം നടത്തിയിരുന്നില്ല. സെമി പോരാട്ടത്തിന് മുന്‍പായി താരം ഫിറ്റ്നസ് വീണ്ടെടുക്കും എന്നാണ് കരുതുന്നത്.
60 വര്‍ഷത്തിനിടയില്‍ ആദ്യമായി ലോക കിരീടം നിലനിര്‍ത്തുന്ന ടീം എന്ന നേട്ടത്തിലേക്ക് അടുക്കാനായാണ് ഫ്രാന്‍സ് സെമിയില്‍ ഇറങ്ങുന്നത്. ഇന്ത്യന്‍ സമയം രാത്രി 12.30 നാണ് മത്സരം. ഇതില്‍ വിജയിക്കുന്നവര്‍ ഞായറാഴ്ച നടക്കുന്ന ഫൈനലില്‍ അര്‍ജന്റീനയുമായി ഏറ്റുമുട്ടും.