സ്ലോവേനിയയ്ക്കെതിരെയുള്ള പോർച്ചുഗലിന്റെ റൗണ്ട് ഓഫ് 16 മത്സരത്തിന്റെ എക്സ്ട്രാ ടൈമിൽ അനുവദിച്ച പെനാൽറ്റി മിസ് ആക്കിയ സൂപ്പർ താരം ക്രിസ്റ്റ്യാനോ റൊണാൾഡോക്ക് ആശ്വാസ മെസ്സേജ് അയച്ചു അൽ നസ്ർ സഹതാരം സാദിയോ മാനെ. ഇരു ടീമുകളും റെഗുലർ ടൈമിൽ ഗോളുകൾ ഒന്നും നേടാത്ത പശ്ചാത്തലത്തിലാണ് കളി എക്സ്ട്രാ ടൈമിലേക്ക് നീണ്ടത്. തുടർന്ന് വന്ന എക്സ്ട്രാ ടൈമിൽ ലിവർപൂൾ താരമായ ഡിയാഗോ ജോട്ടയുടെ ഒരു നീക്കത്തെ ഫൗൾ ചെയ്തതിനെ തുടർന്ന് പോർച്ചുഗലിന് ഒരു പെനാൽറ്റി ലഭിച്ചെങ്കിലും ക്യാപ്റ്റൻ കൂടിയായ ക്രിസ്റ്റ്യാനോക്ക് അത് ഗോൾ ആക്കാൻ സാധിച്ചിരുന്നില്ല.
ദശലക്ഷ കണക്കിന് വരുന്ന പോർച്ചുഗൽ ആരാധകർ റൊണാൾഡോ പന്ത് എടുത്തപ്പോൾ തന്നെ അത് ഗോൾ ആയി മാറി എന്ന ആശ്വാസത്തിലായിരുന്നു ഉണ്ടായിരുന്നത്. പക്ഷെ സ്ലോവേനിയൻ ഗോൾ കൃത്യമായി ആ ഷോട്ട് മനസിലാക്കുകയും തടുക്കുകയും ഗോൾ നേടാനുള്ള അവസരം നിഷേധിക്കുകയും ചെയ്തു. അത്ലറ്റികോ മാഡ്രിഡിന് വേണ്ടി കളിക്കുന്ന ഒബ്ലാക്കാണ് സ്ലോവേനിയയുടെ ഗോൾ കീപ്പർ. പെനാൽറ്റി മിസ് ആയതിനെ തുടർന്ന് കണ്ണീരണിയുന്ന ക്രിസ്റ്റ്യാനോയെയാണ് പിന്നീട് ക്യാമറകൾ കാണിച്ചത്.
എക്സ്ട്രാ ടൈമിലും ഗോൾ ഒന്നും നേടാനാവാത്ത മത്സരം പെനാൽറ്റിയിലേക്ക് നീളുകയും പോർച്ചുഗൽ ഗോൾ കീപ്പർ ഡിയാഗോ കോസ്റ്റ തുടർച്ചയായി മൂന്ന് സേവുകൾ നടത്തിയതിനെ തുടർന്ന് പോർച്ചുഗൽ വിജയിക്കുകയും അടുത്ത റൗണ്ടിലേക്ക് കടക്കുകയും ചെയ്തു. അടുത്ത റൗണ്ടിൽ ക്വാർട്ടർ ഫൈനൽ മത്സരത്തിൽ ബെൽജിയത്തെ തോൽപ്പിച്ചു വരുന്ന ഫ്രാൻസിനെയാണ് പോർച്ചുഗലിന് നേരിടാനുള്ളത്.