ഐപിഎല്ലിൽ ഇന്നലെ നടന്ന ഏകപക്ഷിയ പോരിൽ വമ്പൻ ജയം നേടി റോയൽ ചലഞ്ചേഴ്സ് ബെംഗളൂരു. ഇതോടെ 9 വർഷത്തെ കാത്തിരിപ്പിന് ശേഷം അവർ ഐപിഎൽ ഫൈനലിലെത്തി. ലീഗിൽ മികച്ച പ്രകടനം നടത്തിയ കരുത്തരായ പഞ്ചാബ് കിംഗ്സിനെ 8 വിക്കറ്റിന് തകർത്താണ് ആർസിബി ഫൈനലിലെത്തിയത്. അർദ്ധ സെഞ്ച്വറി നേടിയ ഫിൽ സാൾട്ടിന്റെ തകർപ്പൻ പ്രകടനമാണ് ആർസിബിയ്ക്ക് കാര്യങ്ങൾ എളുപ്പമാക്കിയത്. 102 റൺസ് വിജയലക്ഷ്യം 10 ഓവറുകൾ ബാക്കി നിർത്തി ആർസിബി മറികടന്നു.
ടോസ് നേടി ഫീൽഡിങ് തിരഞ്ഞെടുത്തത് മുതൽ ബെംഗളൂരുവിന് അനുകൂലമായിട്ടാണ് കാര്യങ്ങൾ പോയത്. ജോഷ് ഹേസൽവുഡ്, ഭുവനേശ്വർ കുമാർ, യാഷ് ദയാൽ, സുയാഷ് ശർമ്മ തുടങ്ങി പന്തെറിഞ്ഞ എല്ലാ ആർസിബി ബോളർമാരും മികവ് കാണിച്ചപ്പോൾ ശ്രേയസ് അയ്യർക്കും കൂട്ടർക്കും ഉത്തരമൊന്നും ഇല്ലായിരുന്നു. കൃത്യമായ സമയത്തുള്ള ബോളിങ് മാറ്റങ്ങളും ഫീൽഡിങ് തന്ത്രങ്ങളുമായി നായകൻ രജത് പടിദാറും മികവ് കാണിച്ചു.
മത്സരത്തിൽ ആർസിബി ജയിച്ചെങ്കിലും സൂപ്പർ താരം വിരാട് കോഹ്ലി പഞ്ചാബിന്റെ യുവ താരം മുഷീർ ഖാനെതിരെ മോശം പരാമർശം നടത്തി വിവാദത്തിൽ ആയിരിക്കുകയാണ്. ഇന്ത്യൻ പ്രീമിയർ ലീഗിൽ അരങ്ങേറ്റം കുറിച്ച മുഷീർ ഇറങ്ങിയപ്പോൾ കോഹ്ലി മുഷീറിനെതിരെ മോശം പരാമർശം നടത്തിയ വിഡിയോയാണ് ഇപ്പോൾ ചർച്ചയാകുന്നത്.
കോഹ്ലി മുഷീറിനെ “വാട്ടർബോയ്” എന്ന് വിളിച്ചതായും, ആദ്യ പന്ത് നേരിടാൻ തയ്യാറെടുക്കുമ്പോൾ “യേ പാനി പിലാത ഹേ” (“ഈ ആൾ അല്ലെ വെള്ളം കൊണ്ടുപോകുന്ന താരം”) എന്ന് പറഞ്ഞതായും അവകാശപ്പെട്ടു. ഈ ക്ലിപ്പ് ഇപ്പോൾ ചർച്ചയാകുന്നുണ്ട്. ” ഒരു കൊച്ച് പയ്യനെ സ്ലെധേ ചെയ്തിട്ട് നിങ്ങൾ എന്താണ് ഉദ്ദേശിക്കുന്നത്”, ” ഇതൊന്നും അത്ര മികച്ചത് അല്ല” തുടങ്ങി താരത്തെ വിമർശിച്ച് ആളുകൾ എത്തുന്നുണ്ട്.
മെഗാ ലേലത്തിൽ പഞ്ചാബ് കിംഗ്സ് ഒപ്പം കൂട്ടിയ മുഷീറിനെ ഇംപാക്റ്റ് സബ് ആയി ആണ് അവർ ഇറക്കിയത് . സമ്മർദ്ദത്തിൽ അദ്ദേഹം ബുദ്ധിമുട്ടി. ആർസിബി ലെഗ് സ്പിന്നർ സുയാഷ് ശർമ്മയുടെ പന്തിൽ പുറത്തായ അദ്ദേഹത്തിന് റൺ ഒന്നും നേടാനായില്ല.