ഓസീസിനെതിരായ നാലാം ഏകദിനത്തില് വിജയിച്ച് അഞ്ച് മത്സരങ്ങളുടെ പരമ്പര സ്വന്തമാക്കി ശ്രീലങ്ക. അവസാന പന്തുവരെ ആവേശം നിറഞ്ഞുനിന്ന മത്സരത്തില് നാലു റണ്സിനാണ് ലങ്കയുടെ വിജയം. ശ്രീലങ്ക ഉയര്ത്തിയ 259 റണ്സ് വിജയലക്ഷ്യം പിന്തുടര്ന്ന ഓസീസ് 50 ഓവറില് 254 റണ്സിന് ഓള്ഔട്ടായി.
ഓസ്ട്രേലിയയ്ക്ക് വേണ്ടി ഡേവിഡ് വാര്ണര് 99 റണ്സുമായി പൊരുതിയെങ്കിലും വിജയം കൈപ്പിടിയിലൊതുക്കാന് കഴിഞ്ഞില്ല. 43 പന്തില് നിന്ന് 35 റണ്സെടുത്ത പാറ്റ് കമ്മിന്സിന്റെ പോരാട്ടവും ഫലം കണ്ടില്ല.
ജയിക്കാന് അവസാന ഓവറില് 19 റണ്സ് വേണമെന്നിരിക്കേ ക്യാപ്റ്റന് ദസുന് ഷാനകയെ മൂന്ന് തവണ ബൗണ്ടറി കടത്തിയ മാത്യു കുനെമാന് ലങ്കയ്ക്ക് ആശങ്ക ഉയര്ത്തി. എന്നാല് അവസാന പന്തില് താരത്തെ പുറത്താക്കി ഷാനക ലങ്കയ്ക്ക് ജയം സമ്മാനിച്ചു.
സെഞ്ച്വറി നേടിയ അസലങ്കയും (110) അര്ദ്ധ സെഞ്ച്വറി നേടിയ ധനഞ്ജയ ഡിസില്വയുമാണ് (60) ലങ്കന് നിരയില് തിളങ്ങിയത്. മൂന്നു ദശാബ്ദത്തിനിടെ ഓസ്ട്രേലിയയ്ക്കെതിരെ ശ്രീലങ്ക സ്വന്തം മണ്ണില് നേടുന്ന ആദ്യ പരമ്പര ജയമാണിത്.
പരമ്പരയിലെ ആദ്യ ഏകദിനം ജയിച്ച് ലീഡെടുത്ത ഓസീസിനെതിരേ തുടര്ച്ചയായ മൂന്ന് മത്സരങ്ങളില് ജയം നേടിയാണ് ലങ്ക പരമ്പര സ്വന്തമാക്കിയത്.