ഇന്ത്യന്‍ ടീം ഫിയര്‍ലെസ് ക്രിക്കറ്റ് കളിക്കുന്നില്ലെന്ന ന്യൂസിലാന്‍ഡ് മുന്‍ പേസര്‍ സൈമണ്‍ ഡൂളിന്റെ വിമര്‍ശനത്തിന് മറുപടിയുമായി എസ് ശ്രീശാന്ത്. 2019ലെ ലോകകപ്പില്‍ ഭാഗ്യം കൊണ്ടാണ് ന്യൂസിലാന്‍ഡ് സെമിയില്‍ ഇന്ത്യക്കെതിരേ ജയിച്ചതെന്നും പക്ഷേ ഇത്തവണ വന്‍ നാണക്കേടാവും കിവീസിനെ കാത്തിരിക്കുന്നതെന്നും ശ്രീശാന്ത് പറഞ്ഞു.
ഭാവിയില്‍ ന്യൂസിലാന്‍ഡ് ചിലപ്പോള്‍ ലോകകപ്പ് നേടിയേക്കാം. പക്ഷെ ഇത്തവണ വലിയ നാണക്കേടായിരിക്കും അവരെ കാത്തിരിക്കുന്നത്. നിങ്ങള്‍ക്കു (സൈമണ്‍ ഡൂള്‍) മാധ്യമങ്ങളോടു സംസാരിക്കാന്‍ ഒരു അവസരം ലഭിക്കുമ്പോള്‍ സംസാരിക്കും മുമ്പ് ദയവു ചെയ്ത് ചിന്തിക്കണം.
ന്യൂസിലന്‍ഡിനെ ഇന്ത്യക്കാര്‍ ഇത്തവണ തരിപ്പണമാക്കുമെന്നാണ് സൈമണ്‍ ഡൂളിനോടു ഞാന്‍ പറയാന്‍ ആഗ്രഹിക്കുന്നത്. ഇന്ത്യക്കെതിരേ ചില മല്‍സരങ്ങളില്‍ ന്യൂസിലന്‍ഡ് നന്നായി പെര്‍ഫോം ചെയ്തിട്ടുണ്ടെന്നതു ശരിതന്നെ, പ്രത്യേകിച്ചും ഐസിസി ടൂര്‍ണമെന്റുകളില്‍. പക്ഷെ ആ സമയമൊക്കെ കഴിഞ്ഞു.
നിങ്ങള്‍ പറഞ്ഞ കാര്യം ഇന്ത്യയുടെ ഏതെങ്കിലുമൊരു താരം അറിയുകയാണെങ്കില്‍, വിരാട് കോഹ്‌ലിയോ മറ്റോ അറിയുകയാണെങ്കില്‍ ഇത്തവണത്തെ മല്‍സരം നല്ല രസമായിരിക്കും- ശ്രീശാന്ത് പറഞ്ഞു.
അടുത്തിടെ ഇന്ത്യന്‍ ടീം ഫിയര്‍ലെസ് ക്രിക്കറ്റ് കളിക്കുന്നില്ലെന്നും ഈ കാരണത്താലാണ് ഐസിസി ടൂര്‍ണമെന്റുകളില്‍ ജയിക്കാന്‍ സാധിക്കാതെ പോവുന്നതെന്നും ചൂണ്ടിക്കാട്ടി ഡൂള്‍ രംഗത്തുവന്നിരുന്നു.