രാജസ്ഥാനെതിരായ വിജയത്തോടെ പ്ലേഓഫ് പ്രവേശനം ഉറപ്പിച്ചിരിക്കുകയാണ് ശ്രേയസ് അയ്യരിന്റെ പഞ്ചാബ് കിങ്സ്. സഞ്ജു സാംസണ് തിരിച്ചെത്തിയിട്ടും ആര്ആറിനെതിരെ 10 റണ്സിനാണ് പഞ്ചാബ് ജയിച്ചുകയറിയത്. ഇതോടെ പോയിന്റ് ടേബിളില് മൂന്നാം സ്ഥാനക്കാരായി വര്ഷങ്ങള്ക്ക് ശേഷം പ്ലേഓഫ് ഉറപ്പിക്കുകയായിരുന്നു പഞ്ചാബ്. നായകന് ശ്രേയസ് അയ്യര് ഇന്നലെ ബാറ്റിങ്ങിനിറങ്ങിയെങ്കിലും പരിക്കുളളതിനാല് ഫീല്ഡ് ചെയ്തിരുന്നില്ല. 25 ബോളില് 30 റണ്സെടുത്ത് ടീം സ്കോറിലേക്ക് കാര്യമായ സംഭാവന നല്കിയിരുന്നു ശ്രേയസ്.
അഞ്ച് ബൗണ്ടറികള് ഉള്പ്പെടെയായിരുന്നു പഞ്ചാബ് ക്യാപ്റ്റന്റെ ഇന്നിങ്സ്. ശ്രേയസ് ഫീല്ഡിങ്ങില് ഇറങ്ങാത്തതുകൊണ്ട് ശശാങ്ക് സിങ് ആയിരുന്നു പഞ്ചാബ് കിങ്സിന്റെ സ്റ്റാന്ഡ് ഇന് ക്യാപ്റ്റനായത്. ഗ്രൗണ്ടില് ഇല്ലാത്ത സമയത്ത് താരങ്ങള്ക്ക് കൃത്യമായ നിര്ദേശങ്ങള് ശ്രേയസ് നല്കിയിരുന്നു. അതേസമയം പോസ്റ്റ് മാച്ച് പ്രസന്റേഷനിലായിരുന്നു തനിക്ക് വിരലിന് പരിക്കുളള കാര്യം ശ്രേയസ് വെളിപ്പെടുത്തിയത്. “ഫീല്ഡിങിന് ഇറങ്ങാതിരുന്നതിന് കാരണം കൈവിരലിനേറ്റ പരിക്കാണ്. എന്താണ് സംഭവിച്ചതെന്ന് കൃത്യമായി തനിക്കറിയില്ലെന്ന് താരം പറയുന്നു.
ഇന്നലെ പരിശീലനത്തിനിടെ എനിക്ക് അടിയേറ്റു, എന്താണ് പ്രശ്നമെന്ന് ഞാന് പോയി ഇനി പരിശോധിക്കണം. എല്ലാ കളിക്കാര്ക്കും ഒരു പോസിറ്റീവ് ശരീരഭാഷ നിലനിര്ത്താന് ഞാന് കളിയില് സന്ദേശം കൈമാറികൊണ്ടിരുന്നു. ചില സമയത്ത് നിങ്ങള് താഴെ വീഴുകയും കളി നിങ്ങളില് നിന്ന് അകന്നുപോവുന്നതായി തോന്നുകയും ചെയ്യും. പക്ഷേ ഞാന് കളത്തില് ഇല്ലാത്ത സമയത്ത് ടീമിനായി മികച്ച പോരാട്ടവീര്യം കാഴ്ചവച്ച ഓരോ കളിക്കാരനിലും ഞാന് അഭിമാനിക്കുന്നു”, ശ്രേയസ് അയ്യര് കൂട്ടിച്ചേര്ത്തു.