ഇന്ത്യൻ ടീമിനായി വിവിധ ഫോർമാറ്റുകളിൽ ഓപ്പണിങ് ബാറ്ററായി ഏറെക്കാലം കളിച്ച താരമാണ് ശിഖർ ധവാൻ. രോഹിത് ശർമ്മയ്ക്കൊപ്പം അദ്ദേഹം ഉണ്ടാക്കിയെടുത്ത കൂട്ടുകെട്ടുകൾ ഇന്ത്യക്ക് പല മത്സരങ്ങളിലും നിർണായകമായിരുന്നു. ഒരുകാലത്ത് രോഹിത്, ധവാൻ, കോഹ്ലി എന്നിവരുൾപ്പെട്ട ടോപ് ഓർഡർ ഇന്ത്യൻ ബാറ്റിങ് ലൈനപ്പിന് കരുത്ത് പകർന്നിരുന്നു. യുവതാരങ്ങളുടെ കടന്നുവരവോടെയാണ് ശിഖർ ധവാന് ഇന്ത്യൻ ടീമിൽ സ്ഥാനം നഷ്ടമായത്. 2022 സമയത്തായിരുന്നു ബംഗ്ലാദേശിനെതിരെ ഓപ്പണിങിൽ ഇറങ്ങി ഇഷാൻ കിഷൻ ഇരട്ടസെഞ്ച്വറി നേടിയത്.
അന്ന് തനിക്ക് ഇന്ത്യൻ ടീമിൽ ഇനി അവസരമൊന്നുമുണ്ടാകില്ലെന്ന് വ്യക്തമായെന്ന് തുറന്നുപറയുകയാണ് ധവാൻ. സെലക്ടർമാർ യുവതാരങ്ങൾക്ക് പ്രാധാന്യം നൽകിതുടങ്ങിയതോടെ ധവാൻ തന്റെ വിരമിക്കൽ പ്രഖ്യാപിക്കുകയായിരുന്നു. 2023ൽ നടന്ന ഏകദിന ലോകകപ്പിനുളള ടീമിൽ ധവാനെ ഉൾപ്പെടുത്തിയിരുന്നില്ല. ധവാന് പകരം ഇഷാൻ കിഷനും ശുഭ്മാൻ ഗില്ലും ലോകകപ്പ് സ്ക്വാഡിൽ ഇടം നേടി.
“ഞാൻ അന്ന് അർധസെഞ്ച്വറികൾ നിരവധി നേടുന്നുണ്ടായിരുന്നു, സെഞ്ച്വറികൾ അടിച്ചില്ലെങ്കിലും 70പ്ലസ് റൺസ് നേടാൻ എനിക്ക് കഴിഞ്ഞു. ഇഷാൻ കിഷൻ ഇരട്ട സെഞ്ച്വറി നേടിയപ്പോഴാണ് എനിക്ക് ഇനി അവസരമുണ്ടാകില്ലെന്നും കരിയറിന്റെ അവസാനമാണെന്നും മനസിലായത്. എന്റെ ഉള്ളിൽ നിന്നും ആരോ പറയുന്നത് പോലെ തോന്നി. അങ്ങനെ തന്നെ പിന്നീട് സംഭവിച്ചു. അതിന് ശേഷം ഞാൻ വിഷമത്തിലാണെന്ന് കരുതി എന്റെ സുഹൃത്തുക്കളെല്ലാം വന്ന് എനിക്ക് ഇമോഷണൽ സപ്പോർട്ട് നൽകാനൊക്കെ ശ്രമിച്ചു. പക്ഷെ ഞാൻ ചില്ലായിരുന്നു,’ ഒരഭിമുഖത്തിൽ ധവാൻ പറഞ്ഞു.