പരിക്ക് മാറി ഇന്ത്യന്‍ ടീമിലേക്ക് തിരിച്ചെത്താന്‍ ഒരുങ്ങുകയാണ് യുവ വിക്കറ്റ് പീപ്പര്‍ ബാറ്റര്‍ സഞ്ജു സാംസണ്‍. താരം ഇപ്പോള്‍ സോഷ്യല്‍ മീഡിയയില്‍ പങ്കുവെച്ചിരിക്കുന്ന ചിത്രം ആരാധകര്‍ക്കിടയില്‍ വൈറലായിരിക്കുകയാണ്. രാജസ്ഥാന്‍ റോയല്‍സിലെ സഞ്ജുവിന്റെ സഹതാരമായ ഷിംറോണ്‍ ഹെറ്റ്മെയറിട്ട കമന്റാണ് ആരാധകരെ ത്രസിപ്പിച്ചിരിക്കുന്നത്.
കറുപ്പ് ജാക്കറ്റണിഞ്ഞ് സ്പോര്ട്സ് ബൈക്കിന് അരികില്‍ നില്‍ക്കുന്ന ഫോട്ടോയായിരുന്നു ഇന്‍സ്റ്റഗ്രാമിലൂടെ സഞ്ജു സാംസണ്‍ പങ്കുവച്ചത്. ഇതിനു താഴെയായിരുന്നു ഹെറ്റ്മെയറുടെ ട്രോള്‍ കമന്റ്. ‘ലുക്ക് അത്ര മോശമില്ല. ആ മെഷീനൊപ്പം എന്തു ചെയ്യണമെന്നു നിനക്ക് അറിയുമെന്നു വിശ്വസിക്കുന്നു’ എന്നായിരുന്നു ഹെറ്റ്മെയറുടെ പരിഹാസം.
പിന്നാലെ സഞ്ജുവിന്റെ മറുപടിയും വന്നു. ‘ഹഹ, ഹെറ്റി.. അടുത്ത തവണ നമ്മള്‍ കണ്ടുമുട്ടുമ്പോള്‍ നിന്നെ എന്ത് ചെയ്യണമെന്നു എനിക്കറിയാം? എന്ന് കൈമുഷ്ടി ചുരുട്ടി ഇടിക്കുന്ന ഇമോജിയൊപ്പം സഞ്ജു കുറിച്ചു.
പരിക്കില്‍ നിന്നു മോചിതനായി ഫിറ്റ്നസ് ടെസ്റ്റും വിജയിച്ച് ക്രിക്കറ്റിലേക്കു ശക്തമായ തിരിച്ചുവരവിന് തയ്യാറെടുക്കുകയാണ് സഞ്ജു. ഓസ്ട്രേലിയക്കെതിരേ അടുത്ത മാസം നടക്കാനിരിക്കുന്ന ഏകദിന പരമ്പരയാണ് സഞ്ജുവിന് ടീമില്‍ തിരിച്ചെത്താനുള്ള ഏകവാതില്‍. ഈ പരമ്പരയില്‍ നിന്നും തഴയപ്പെട്ടാല്‍ പിന്നീട് ഐപിഎല്ലിനു ശേഷം മാത്രമേ സഞ്ജുവിനെ ഇന്ത്യന്‍ കുപ്പായത്തില്‍ തിരിച്ചെത്താനാകൂ.