തന്റെ മൂന്നാമത്തെ ഡബിള്‍ സെഞ്ച്വറി നേടിയതിന് പിന്നാലെ രോഹിത്തിന് സോഷ്യല്‍ മീഡിയയിലൂടെ ആശംസകളുടെ പ്രവാഹമായിരുന്നു. ബോളിവുഡ് താരം അനുപം ഖേറിന്റെ ആശംസയറിയിച്ചുള്ള ട്വീറ്റാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത്.
വിവാഹ വാര്‍ഷിക ദിനത്തിലാണ് തന്റെ മൂന്നാമത്തെ ഡബിള്‍ സെഞ്ച്വറി തികച്ച് രോഹിത്ത് ലോകത്തിലെ ഒരു ഭര്‍ത്താക്കന്മാര്‍ക്കും സ്വപ്നം കാണാനാകാത്ത സമ്മാനം ഭാര്യയ്ക്ക് നല്‍കിയത്. മെഹീലിയിലെ ഗ്യാലറിയിലിരുന്നു ആനന്ദ കണ്ണീര്‍ പൊഴിച്ചായിരുന്നു രോഹിത്തിന്റെ ഭാര്യ റിതിക ഈ വിവാഹ സമ്മാനം ഏറ്റുവാങ്ങിയത്. ഡബിള്‍ സെഞ്ച്വറി നേടിയതിന്റെ ആഹ്ലാദപ്രകടനം നടത്തുന്നതിനിടയില്‍ രോഹിത്ത് തന്റെ മോതിരവിരലില്‍ ചുംബിച്ചുകൊണ്ടാണ് റിതികയോടുള്ള സ്‌നേഹം പ്രകടിപ്പിച്ചത്. ഈ ചിത്രങ്ങളെല്ലാം സോഷ്യല്‍മീഡിയയില്‍ വൈറലായതുമായിരുന്നു.
ഇപ്പോഴിതാ റിതികയ്ക്കും അഭിനന്ദനവുമായി ബോളിവുഡ് താരമായ അനുപം ഖേറിന്റെ ട്വീറ്റാണ് സോഷ്യല്‍ മീഡിയയില്‍ വൈറലായിരിക്കുന്നത്. റിതികയുടേയും രോഹിതിന്റേയും പ്രണയ കഥയുടെ വിശുദ്ധി ഒരു സിനിമയ്ക്കും പകര്‍ത്താന്‍ കഴിയാത്തതെന്നാണ് അനുപമിന്റെ ട്വീറ്റ്.
153 പന്തില്‍ 13 ഫോറും 12 സിക്സും സഹിതമാണ് രോഹിത്തിന്റെ താണ്ഡവം. ആദ്യ മത്സരത്തില്‍ തകര്‍ന്നടിഞ്ഞ ഇന്ത്യന്‍ ബാറ്റ്സ്മാന്‍മാരുടെ അത്യുഗ്രന്‍ തിരിച്ചുവരവിനാണ് മൊഹാലി സാക്ഷിയായത്. നേരത്തെ രോഹിത്തിന്റെ ഇ്ന്നിങ്‌സിനെ പ്രകീര്‍ത്തിച്ചുകൊണ്ട് സച്ചിനും സേവാഗും ഉള്‍പ്പടെ നിരവധിപ്പേരാണ് ട്വീറ്റ് ചെയ്തത്.