കഴിഞ്ഞ ദിവസം വിവാഹിതനായ ഇന്ത്യന്‍ ക്രിക്കറ്റ് താരം ദീപക് ചാഹറിനെ ട്രോളി സഹോദരി മാലതി ചാഹര്‍ പങ്കുവെച്ച കുറിച്ച് വൈറല്‍. അഭിനന്ദനത്തിനൊപ്പം ഈ വര്‍ഷം ഓസ്‌ട്രേലിയയില്‍ നടക്കുന്ന ടി20 ലോക കപ്പ് മുന്‍നിര്‍ത്തി മാലതി കുറിച്ചൊരു ഓര്‍മപ്പെടുത്തലാണ് പോസ്റ്റിനെ വൈറലാക്കിയിരിക്കുന്നത്.
‘രണ്ടു പേര്‍ക്കും നല്ലൊരു വിവാഹ ജീവിതം ആശംസിക്കുന്നു. ഹണിമൂണിനിടെ പുറം വേദനയുടെ കാര്യത്തില്‍ പ്രത്യേക ശ്രദ്ധ വേണം. നമുക്ക് ലോക കപ്പ് കളിക്കേണ്ടതാണ്’ എന്നാണ് ദീപക് ചാഹറിനെ ടാഗ് ചെയ്ത് മാലതി ചാഹര്‍ കുറിച്ചത്. മൂവരും നില്‍ക്കുന്ന ചിത്രത്തിനൊപ്പമാണ് മാലതി ഈ കുറിപ്പ് പങ്കുവെച്ചത്.
പുറത്തിനേറ്റ പരിക്ക് കാരണം നിലവില്‍ കളിക്കളത്തിന് പുറത്താണ് താരം. പരിക്കിനെ തുടര്‍ന്ന് കഴിഞ്ഞ ഐപിഎല്‍ സീസണും താരത്തിന് നഷ്ടമായിരുന്നു.
ഈ മാസം ഒന്നാം തിയതിയാണ് ദീപക് ചാഹര്‍ പ്രതിശ്രുത വധുവായ ജയ ഭരദ്വാജിനെ വിവാഹം ചെയ്തത്. വിഹാഹത്തിന്റെ ചിത്രം ദീപക് ചാഹറിന്റെ ബന്ധുവും ക്രിക്കറ്റ് താരവുമായ രാഹുല്‍ ചാഹര്‍ സോഷ്യല്‍ മീഡിയയില്‍ പങ്കുവെച്ചിരുന്നു.
2021 ഐപിഎല്‍ സീസണില്‍, ചെന്നൈ- പഞ്ചാബ് മത്സരത്തിനിടെ ഗാലറിയില്‍ വെച്ചാണു സുഹൃത്ത് ജയ ഭരദ്വാജിനോടു ദീപക് ചാഹര്‍ വിവാഹാഭ്യര്‍ഥന നടത്തിയത്. ഗാലറിയില്‍ കളികണ്ടിരുന്ന ജയ ഭരദ്വാജിനടുത്തേക്കു നടന്നെത്തി ദീപക് ചാഹര്‍ വിവാഹാഭ്യര്‍ഥന നടത്തുന്നതിന്റെ വിഡിയോ സമൂഹ മാധ്യമങ്ങളില്‍ വൈറലായിരുന്നു.