ഐപിഎല് ഫൈനലില് പഞ്ചാബ് കിങ്സ്-റോയല് ചലഞ്ചേഴ്സ് ബെംഗളൂരു പോരാട്ടത്തിനായി കാത്തിരിക്കുകയാണ് ആരാധകര്. അഹമ്മദാബാദിലെ നരേന്ദ്ര മോദി സ്റ്റേഡിയത്തില് വച്ചാണ് ഇന്ന് ഫൈനല് നടക്കുക. ഇരുടീമുകളും തങ്ങളുടെ ആദ്യത്തെ ഐപിഎല് കിരീടത്തിനായാണ് ഇറങ്ങുന്നത്. ടോപ് 2 ടീമുകളായിട്ടാണ് പഞ്ചാബും ആര്സിബിയും ഇത്തവണ ലീഗ് സ്റ്റേജില് ഫിനിഷ് ചെയ്തത്. തുടര്ന്ന് ക്വാളിഫയര് 1ല് പഞ്ചാബിനെ തോല്പ്പിച്ച് ആര്സിബി നേരിട്ട് ഫൈനലിലേക്ക് യോഗ്യത നേടുകയായിരുന്നു. ക്വാളിഫയര് 2ല് മുംബൈ ഇന്ത്യന്സിനെ അഞ്ച് വിക്കറ്റിന് തോല്പ്പിച്ച് പഞ്ചാബും കലാശപോരാട്ടത്തിന് യോഗ്യത നേടി.
ഫൈനലിന് ഒരുങ്ങുന്ന ആര്സിബി ടീമിന് സ്റ്റാര് ബാറ്റര് ഫില് സാള്ട്ടിന്റെ പിന്മാറ്റം തിരിച്ചടിയായിരിക്കുകയാണ്. ആദ്യത്തെ കുഞ്ഞിന്റെ ജനനവുമായി ബന്ധപ്പെട്ട് സാള്ട്ട് ഫൈനലിന് ഉണ്ടാവില്ലെന്നാണ് റിപ്പോര്ട്ടുകള് സൂചിപ്പിക്കുന്നത്. ആര്സിബിയുടെ ട്രെയിനിങ് സെഷനില് ഇംഗ്ലീഷ് ബാറ്റര് പങ്കെടുത്തിരുന്നില്ല. ഫൈനലില് സാള്ട്ട് ടീമില് ഉണ്ടാവുമോ എന്ന കാര്യത്തില് മത്സരത്തിന് മുന്പുളള വാര്ത്താസമ്മേളനത്തില് ക്യാപ്റ്റന് രജത് പാട്ടിധാറോ കോച്ച് ആന്ഡി ഫ്ളവറോ പ്രതികരിച്ചിരുന്നില്ല.
ഈ സീസണില് ആര്സിബിയെ ഫൈനലില് എത്തിക്കുന്നതില് നിര്ണായക പങ്കാണ് ഫില് സാള്ട്ട് വഹിച്ചിരുന്നത്. 12 മത്സരങ്ങളില് നിന്നായി 387 റണ്സാണ് സാള്ട്ട് നേടിയത്. 35.18 ശരാശരിയിലും 175.90 സ്ട്രൈക്ക് റേറ്റിലുമാണ് ഈ നേട്ടം. നാല് അര്ധസെഞ്ച്വറികള് ആര്സിബിക്കായി ഇംഗ്ലീഷ് ബാറ്റര് നേടി. വിരാട് കോഹ്ലിക്കൊപ്പം നിരവധി മത്സരങ്ങളില് ഓപ്പണിങ്ങില് സാള്ട്ട് മികച്ച കൂട്ടുകെട്ടുണ്ടാക്കി.