രോഹിത് ശര്മ്മയുടെ വിരമിക്കലിന് പിന്നാലെ ഇന്ത്യന് ടീമിന്റെ അടുത്ത ടെസ്റ്റ് ക്യാപ്റ്റന് ആരാവുമെന്നാണ് ക്രിക്കറ്റ് പ്രേമികള് ഒന്നടങ്കം ഉറ്റുനോക്കുന്നത്. ജസ്പ്രീത് ബുംറ, ശുഭ്മാന് ഗില്, റിഷഭ് പന്ത് തുടങ്ങിയവരുടെ പേരുകളാണ് സാധ്യതാപട്ടികയിലുളളത്. ഇതില് ശുഭ്മാന് ഗില് അടുത്ത ടെസ്റ്റ് ടീം ക്യാപ്റ്റനാവാനുളള സാധ്യതകള് കൂടുതലാണ്. കാരണം രോഹിത് ശര്മ്മ വിരമിച്ച ഒഴിവിലേക്ക് ഒരു ദീര്ഘകാല ക്യാപ്റ്റനെയാണ് ബിസിസിഐ നോക്കുന്നത്. യുവതാരമായ ഗില് അന്താരാഷ്ട്ര ക്രിക്കറ്റില് മികച്ച ഫോം തുടരുന്ന സാഹചര്യത്തില് ക്യാപ്റ്റാനാവാന് എന്തുകൊണ്ടും യോഗ്യനാണ് താരം.
അതേസമയം രോഹിത് ശര്മ്മയ്ക്ക് ഒരു പകരക്കാരനെ കണ്ടെത്തുക പ്രയാസമായിരിക്കുമെന്ന് പറയുകയാണ് മുന് ഓസ്ട്രേലിയന് ക്യാപ്റ്റന് മൈക്കല് ക്ലാര്ക്ക്. “ടെസ്റ്റ് ക്രിക്കറ്റില്, പ്രത്യേകിച്ച് ക്യാപ്റ്റനെന്ന നിലയില്, രോഹിത് ശര്മ്മ ഒരു തന്ത്രപരമായ പ്രതിഭയായതിനാല് ഇന്ത്യയ്ക്ക് അദ്ദേഹത്തിന്റെ സേവനം നഷ്ടമാകുമെന്ന് ക്ലാര്ക്ക് പറയുന്നു. രോഹിത്തിന് പകരക്കാരനാവുക എന്നത് ഏതൊരു കളിക്കാരനും വളരെ ബുദ്ധിമുട്ടായിരിക്കുമെന്നും നിലവിലെ ഇന്ത്യന് ഏകദിന ക്യാപ്റ്റന് ഗെയിമിനെ നന്നായി മനസിലാക്കുന്ന താരമാണെന്നും ക്ലാര്ക്ക് കൂട്ടിച്ചേര്ത്തു.
ജൂണ് 20നാണ് ഇംഗ്ലണ്ടിനെതിരായ അഞ്ച് മത്സരങ്ങള് അടങ്ങുന്ന ടെസ്റ്റ് പരമ്പര ആരംഭിക്കുന്നത്. ഓസ്ട്രേലിയ, ന്യൂസിലന്ഡ് ടീമുകള്ക്കെതിരെ പരമ്പര കൈവിട്ടതോടെ പുതിയൊരു ടീമിനെ തിരഞ്ഞെടുക്കുക എന്നത് സെലക്ടര്മാര്ക്ക് വലിയ വെല്ലുവിളിയായിരിക്കും. ഈ മാസം അവസാനമോ ജൂണ് ആദ്യമോ ഇംഗ്ലണ്ടിനെതിരെയുളള ഇന്ത്യന് ടീമിനെ പ്രഖ്യാപിക്കാനാണ് സാധ്യത