ഡല്ഹി ക്യാപിറ്റല്സ്-കൊല്ക്കത്ത നൈറ്റ് റൈഡേഴ്സ് മത്സരശേഷം കുല്ദീപ് യാദവ് റിങ്കു സിങ്ങിന്റെ മുഖത്തടിക്കുന്ന ഒരു വീഡിയോ കഴിഞ്ഞ ദിവസം സോഷ്യല് മീഡിയയില് നിറഞ്ഞിരുന്നു. എതിര് ടീമിലെ കളിക്കാര് പരസ്പരം സംസാരിക്കുന്നതിനിടെയായിരുന്നു അപ്രതീക്ഷിതമായി കുല്ദീപ് റിങ്കുവിന്റെ മുഖത്തടിച്ചത്. സംഭാഷണത്തിനിടെ കുല്ദീപിനോട് എന്തോ പറഞ്ഞ് ചിരിച്ച റിങ്കു തിരിച്ച് താരത്തിന്റെ മുഖത്തേക്ക് നോക്കിയപ്പോഴാണ് കുല്ദീപ് ശക്തിയില് താരത്തിന്റെ മുഖത്തടിച്ചത്. അടിയുടെ ശക്തിയില് കുല്ദീപിനെ തരിച്ചുകൊണ്ട് റിങ്കു നോക്കുന്നതും വീഡിയോയില് കാണാമായിരുന്നു.
ഇതിന് പിന്നാലെ വലിയ വിമര്ശനമാണ് കുല്ദീപ് യാദവിനെതിരെ സോഷ്യല് മീഡിയയില് ഉണ്ടായത്. റിങ്കുവിനെതിരെ കുല്ദീപ് കാണിച്ചത് ശരിയായില്ലെന്നും മാപ്പ് പറയണമെന്നുമൊക്കെയായിരുന്നു ആരാധകര് ആവശ്യപ്പെട്ടത്. എന്നാല് സംഭവം വിവാദമായതോടെ കൊല്ക്കത്ത നൈറ്റ് റൈഡേഴ്സ് അവരുടെ സോഷ്യല് മീഡിയ പേജില് റിങ്കുവും കുല്ദീപും ഒരുമിച്ചുളള സൗഹൃദ നിമിഷങ്ങളുടെ വീഡിയോ പങ്കുവച്ച് എത്തിയിരുന്നു. മീഡിയ കാണിക്കുന്നതും ശരിക്കുമുളള സത്യവും എന്ന കാപ്ഷനിലാണ് കൊല്ക്കത്തയുടെ പുതിയ വീഡിയോ വന്നത്.
ഞങ്ങളുടെ കഴിവുളള യുപി ബോയ്സ് എന്നും കൊല്ക്കത്ത വീഡിയോക്കൊപ്പം കുറിച്ചു. ഇരുവരും അടുത്ത സുഹൃത്തുക്കളാണെന്ന് കാണിക്കുന്ന തരത്തിലുളള സൗഹൃദ നിമിഷങ്ങളാണ് വീഡിയോയിലുളളത്. ഡല്ഹിയുടെ ഹോംഗ്രൗണ്ടായ അരുണ് ജെയ്റ്റ്ലീ സ്റ്റേഡിയത്തില് നടന്ന മത്സരശേഷമായിരുന്നു ഈ സംഭവം. ഈ കളിയില് ഡല്ഹിക്കെതിരെ 14 റണ്സിനാണ് കൊല്ക്കത്ത ജയിച്ചത്.