അന്താരാഷ്ട്ര ക്രിക്കറ്റില്‍ ഒരോവറിലെ ആറ് പന്തും സിക്സര് പറത്തുന്ന മൂന്നാമത്തെ മാത്രം താരമായി വിന്‍ഡീസ് നായകന്‍ കീറോണ്‍ പൊള്ളാര്‍ഡ്. ശ്രീലങ്കയ്‌ക്കെതിരെ നടന്ന ടി20 മത്സരത്തിലാണ് പൊള്ളാര്‍ഡ് കത്തിക്കയറിയത്. ഇതേ മത്സരത്തില്‍ തന്നെ ഹാട്രിക് നേട്ടം ആഘോഷിച്ച ശ്രീലങ്കന്‍ സ്പിന്നര്‍ അഖില ധനഞ്ജയെയാണ് പൊള്ളാര്‍ഡിന്റെ ബാറ്റിന്റെ ചൂടറിഞ്ഞത്.
വിന്‍ഡീസ് ഇന്നിംഗ്‌സിന്റെ നാലാം ഓവറിലായിരുന്നു അഖിലയുടെ ഹാട്രിക്ക് പ്രകടനം. എവിന്‍ ലെവിസ്, ക്രിസ് ഗെയ്ല്‍, നിക്കോളാണ് പൂരന്‍ എന്നിവരെയാണ് അഖില അടുത്തടുത്ത ബോളുകളില്‍ പുറത്താക്കിയത്. ഇതിന് പ്രതികാരമെന്നോണം അഖിലയുടെ അടുത്ത ഓവര്‍ നേരിട്ട പൊള്ളാര്‍ഡ് ആറ് ബോളും നിലംതൊടാതെ അതിര്‍ത്തി കടത്തി. മത്സരതത്തില്‍ പൊള്ളാര്‍ഡ് 11 ബോളില്‍ 38 റണ്‍സെടുത്തു.
അന്താരാഷ്ട്ര ക്രിക്കറ്റില്‍ ഒരോവറിലെ ആറ് പന്തും സിക്സര് പറത്തുന്ന മൂന്നാമത്തെ മാത്രം താരമാണ് പൊള്ളാര്‍ഡ്. ഇതിന് മുമ്പ് ദക്ഷിണാഫ്രിക്കയുടെ ഹെര്‍ഷ്വല്‍ ഗിബ്സ്, ഇന്ത്യയുടെ യുവരാജ് സിംഗ് എന്നിവരാണ് ഈ നേട്ടം സ്വന്തമാക്കിയത്.
മത്സരത്തില്‍ വിന്‍ഡീസ് നാല് വിക്കറ്റിന്‌വിജയിച്ചു. ആദ്യം ബാറ്റ് ചെയ്ത ശ്രീലങ്ക 9 വിക്കറ്റ് നഷ്ടത്തില്‍ 131 റണ്‍സെടുത്തപ്പോള്‍ മറുപടിക്കിറങ്ങിയ വിന്‍ഡീസ് 13.1 ഓവറില്‍ 6 വിക്കറ്റ് നഷ്ടത്തില്‍ ലക്ഷ്യം കണ്ടു.