ടി20 പരമ്പരയില്‍ ഇംഗ്ലീഷ് ബാറ്റര്‍മാര്‍ക്ക് മേല്‍ നേടിയ ആധിപത്യം വരുണ്‍ ചക്രവര്‍ത്തി ഏകദിന പരമ്പരയില്‍ പ്രതീക്ഷിക്കേണ്ടെന്ന് ഇംഗ്ലീഷ് മുന്‍ നായകന്‍ കെവിന്‍ പീറ്റേഴ്സണ്. ഏകദിനത്തില്‍ ഇംഗ്ലീഷ് ബാറ്റര്‍മാര്‍ അദ്ദേഹത്തിനെതിരെ നന്നായി ബാറ്റു ചെയ്യുമെന്ന് പീറ്റേഴ്സണ് പറഞ്ഞു. അതിനുള്ള കാരണവും താരം വെളിപ്പെടുത്തി.
ഏകദിനങ്ങളില്‍ ഇംഗ്ലീഷ് ബാറ്റര്‍മാര്‍ അദ്ദേഹത്തിനെതിരെ നന്നായി ബാറ്റു ചെയ്യും. കാരണം അവര്‍ക്ക് കൂടുതല്‍ സമയം ലഭിക്കും. ഇതൊരു ദൈര്‍ഘ്യമേറിയ ഫോര്‍മാറ്റാണ്, ഓരോ പന്തും ആക്രമിക്കേണ്ടതില്ല. പക്ഷേ ചക്രവര്‍ത്തിയെ ടീമില്‍ ചേര്‍ക്കാന്‍ ഇന്ത്യ എടുത്ത തീരുമാനം മികച്ച തീരുമാനമാണെന്ന് ഞാന്‍ കരുതുന്നു- പീറ്റേഴ്സണ് പറഞ്ഞു.
ഇംഗ്ലണ്ടിനെതിരായ ടി20 പരമ്പരയില്‍ മികച്ച പ്രകടനം കാഴ്ചവെച്ച വരുണ്‍ ചക്രവര്‍ത്തിയെ പിന്നീട് ഏകദിന പരമ്പരയ്ക്കുള്ള ടീമില്‍ ഉള്‍പ്പെടുത്തിയിരുന്നു. ഐസിസി ചാമ്പ്യന്‍സ് ട്രോഫിക്കുള്ള തയ്യാറെടുപ്പിന് ഊന്നല്‍ നല്‍കി ഇംഗ്ലണ്ട് ഏകദിന പരമ്പരയ്ക്കുള്ള പ്രീ-സീരീസ് പരിശീലന ക്യാമ്പ് ഫെബ്രുവരി 2 മുതല്‍ ഇന്ത്യ ആരംഭിച്ചു.
കഴിഞ്ഞ വര്‍ഷം ഒക്ടോബറില്‍ ഇന്ത്യന്‍ ടീമില്‍ തിരിച്ചെത്തിയതിന് ശേഷം മിസ്റ്ററി സ്പിന്നര്‍ തന്റെ പുതിയ പതിപ്പ് പ്രദര്‍ശിപ്പിച്ചു. 2021 നവംബറില്‍ ടി20 ടീമില്‍ നിന്ന് ഒഴിവാക്കപ്പെട്ടതിന് ശേഷം, മൂന്ന് വര്‍ഷത്തെ ഇടവേളകഴിഞ്ഞ ടീമില്‍ തിരിച്ചെത്തിയ താരം ബംഗ്ലാദേശ്, ദക്ഷിണാഫ്രിക്ക, ഇപ്പോള്‍ ഇംഗ്ലണ്ട് എന്നിവയ്ക്കെതിരായ ടി20 പരമ്പരയിലൂടെ ശരിക്കും ശ്രദ്ധേയനായി. ഇംഗ്ലണ്ടിനെതിരായ അഞ്ച് മത്സരങ്ങളുടെ ടി20യില്‍ 14 വിക്കറ്റുകള്‍ വീഴ്ത്തിയ അദ്ദേഹം പ്ലെയര്‍ ഓഫ് ദി സീരീസ് അവാര്‍ഡിന് അര്‍ഹനായി.