ഇപ്പോൾ നടക്കുന്ന ഐപിഎലിൽ ചെന്നൈ സൂപ്പർ കിങ്സിനെതിരെ രാജസ്ഥാൻ റോയൽസിന് തകർപ്പൻ ജയം. 8 വിക്കറ്റുകൾക്കും 47 പന്തുകൾ ബാക്കിനിൽക്കേയുമാണ് രാജസ്ഥാൻ വിജയ സ്കോർ മറികടന്നത്. രാജസ്ഥാൻ റോയൽസിന് വേണ്ടി യുവ താരം വൈഭവ് സൂര്യവൻഷി 17 പന്തുകളിൽ നിന്നായി 5 സിക്സും 4 ഫോറുമായി 52 റൺസാണ് താരം നേടിയത്.
ടോസ് നഷ്ടപ്പെട്ട് ബാറ്റിംഗിനിറങ്ങിയ സിഎസ്കെയ്ക്ക് തുടക്കം മുതലേ പിഴച്ചു. രാജസ്ഥാൻ ബൗളർമാരായ ജോഫ്ര ആർച്ചർ, നാന്ദ്രെ ബർഗർ, രവീന്ദ്ര ജഡേജ എന്നിവർ രണ്ട് വിക്കറ്റ് വീതം വീഴ്ത്തിയതോടെ ചെന്നൈ നിര 19.4 ഓവറിൽ 127 റൺസിന് പുറത്തായി. പിച്ചിലെ ഈർപ്പവും ചലനവും മുതലെടുത്ത രാജസ്ഥാൻ ബൗളർമാർക്ക് മുന്നിൽ സിഎസ്കെ ബാറ്റർമാർ പതറുകയായിരുന്നു.
യുവതാരം വെയ്ഭവിനെ പ്രശംസ കൊണ്ട് മൂടുകയാണ് ക്യാപ്റ്റൻ റിയാൻ പരാഗ്. മത്സരശേഷം സംസാരിക്കവെ അദ്ദേഹം പറഞ്ഞത് ഇങ്ങനെ:
“വെയ്ഭവിനോട് പുറത്തെ ചർച്ചകളൊന്നും ശ്രദ്ധിക്കരുതെന്ന് ഞങ്ങൾ പറഞ്ഞിട്ടുണ്ട്. അവന് ബാറ്റിംഗ് വളരെ ഇഷ്ടമാണ്, അതിനാൽ നെറ്റ്സിൽ ആവശ്യത്തിന് സമയം നൽകുന്നുണ്ട്. അവൻ ഞങ്ങളുടെ ടീമിലുണ്ടായതിൽ സന്തോഷം, എതിർ ടീമിലല്ലല്ലോ എന്നത് വലിയ ആശ്വാസമാണ്.” റിയാൻ പരാഗ് പറഞ്ഞു.