ഇംഗ്ലണ്ടില്‍ നടക്കുന്ന ഏകദിന ലോക കപ്പിനുള്ള ഇന്ത്യന്‍ ടീമിലേക്ക് രണ്ട് സ്റ്റാന്‍ഡ് ബൈ താരങ്ങള്‍ കൂടി. മുതിര്‍ന്ന പേസ് ബൗളര്‍ ഇഷാന്ത് ശര്‍മ്മയെയും ഇടംകൈയന്‍ സ്പിന്നര്‍ അക്ഷര്‍ പട്ടേലിനെയുമാണ് പുതുതായി സ്റ്റാന്‍ഡ് ബൈ കളിക്കാരായി സെലക്ഷന്‍ കമ്മിറ്റി തിരഞ്ഞെടുത്തത്.
നേരത്തെ പ്രഖ്യാപിച്ച മൂന്ന് താരങ്ങള്‍ക്ക് പുറമേയാണിത്. റിഷഭ് പന്ത്, അമ്പാട്ടി റായിഡു, നവദീപ് സെയ്‌നി എന്നിവരെ കഴിഞ്ഞ ദിവസം ലോക കപ്പിനുള്ള സ്റ്റാന്‍ഡ് ബൈ താരങ്ങളായി ബിസിസിഐ പ്രഖ്യാപിച്ചിരുന്നു.
ഇതോടെ രണ്ട് ബാറ്റ്‌സ്മാന്‍മാര്‍, രണ്ട് പേസര്‍മാര്‍, ഒരു സ്പിന്നര്‍ എന്നിവരെയാണ് സ്റ്റാന്‍ഡ് ബൈ ആയി തിരഞ്ഞെടുത്തിരിക്കുന്നത്. ഇവരില്‍ നവദീപ് സെയ്‌നി ഒഴികെയുള്ളവര്‍ ടീമിനൊപ്പം പോകില്ലെങ്കിലും ആര്‍ക്കെങ്കിലും പരിക്കേറ്റാല്‍ ഏത് നിമിഷവും ഇവരെ ടീമില്‍ ഉള്‍പ്പെടുത്തും. സെയ്‌നിയെ ഇന്ത്യന്‍ ടീമിന്റെ നെറ്റ്‌സില്‍ പന്തെറിയാനുള്ള ബൗളറായി കൂടി തിരഞ്ഞെടുത്തതിനാല്‍ സെയ്‌നി ഇന്ത്യന്‍ ടീമിനൊപ്പം ഇംഗ്ലണ്ടിലേക്ക് പോകും.
ടെസ്റ്റിലെ ഇന്ത്യയുടെ ബൗളിംഗ് കുന്തമുനയാണ് ഇഷാന്തെങ്കിലും ഏകദിനങ്ങളില്‍ സ്ഥിരം സാന്നിധ്യമല്ല. എന്നാല്‍ ഇഷാന്തിന്റെ അനുഭവസമ്പത്ത് കണക്കിലെടുത്താണ് അദ്ദേഹത്തെ സ്റ്റാന്‍ഡ് ബൈ ലിസ്റ്റില്‍ ഉള്‍പ്പെടുത്തിയതെന്ന് ബിസിസിഐ പ്രതിനിധി ഇഎസ്പിഎന്‍ ക്രിക്ക് ഇന്‍ഫോയോട് പറഞ്ഞു.