ഐപിഎല്‍ മെഗാ താരലേലത്തിനു മുമ്പായി പഞ്ചാബ് കിംഗ്‌സ് വിടാനുണ്ടായ കാരണം വെളിപ്പെടുത്തി കെഎല്‍ രാഹുല്‍. ടീം വിടാനുള്ള തീരുമാനം തന്റേത് മാത്രമായിരുന്നെന്നും വ്യത്യസ്തമായ അനുഭവങ്ങള്‍ തേടിയാണ് ടീം വിട്ടതെന്നും രാഹുല്‍ പറഞ്ഞു.
‘പഞ്ചാബ് വിടാനുള്ള തീരുമാനം ഏറെ ശ്രമകരമായിരുന്നു. ഏറെ ആലോചിച്ചാണ് ഈ തീരുമാനത്തിലെത്തിയത്. നാല് വര്‍ഷമായി പഞ്ചാബിനൊപ്പമായിരുന്നു ഞാന്‍. എല്ലാ സീസണുകളിലും മികച്ച പ്രകടനംതന്നെ പുറത്തെടുക്കാനുമായി. പക്ഷേ, പഞ്ചാബിന് അപ്പുറം എന്താണ് കാത്തിരിക്കുന്നതെന്ന് എന്നു പരീക്ഷിക്കാന്‍ ഞാന്‍ തീരുമാനിക്കുകയായിരുന്നു. അങ്ങനെയാണ് എന്റെ പുതിയ യാത്രയ്ക്കു തുടക്കമായത്’ രാഹുല്‍ പറഞ്ഞു.
കഴിഞ്ഞ രണ്ടു സീസണുകളിലും പഞ്ചാബ് കിങ്സിനെ നയിച്ചത് രാഹുലായിരുന്നു. പക്ഷെ രണ്ടു തവണയും ടീമിനെ പ്ലേഓഫിലെത്തിക്കാന്‍ അദ്ദേഹത്തിനായില്ല. പഞ്ചാബിലെ മോശം പ്രകടനനത്തിന് ഇത്തവണ ലഖ്നൗവിനൊപ്പം പ്രായശ്ചിത്തം ചെയ്യാനായിരിക്കും രാഹുലിന്റെ ശ്രമം.
പുതിയ സീസണില്‍ ലഖ്‌നൗ ജയ്ന്റ്‌സിന്റെ നായകനാണ് രാഹുല്‍. ഐപിഎല്ലില്‍ ക്യാപ്റ്റനെന്ന നിലയില്‍ രാഹുലിന്റെ വിജയശരാശരി 44 ശതമാനം മാത്രമാണ്. പഞ്ചാബിനെ 27 കളികളിലാണ് അദ്ദേഹം നയിച്ചത്. ഇതില്‍ 12 എണ്ണത്തില്‍ ടീം വിജയിച്ചപ്പോള്‍ 15 എണ്ണത്തില്‍ തോല്‍ക്കുകയും ചെയ്തു.